Lillard hmangin Blazers beiseina a nung

Nimin zing NBA regular season inkhelah Damian Lillard-a'n a thiam thil pho chhuak lehin Portland Trail Blazers chu an chunga awm Dallas Mavericks lakah 134-131 in hnehna a chanpui.

Lillard hian point 61 zet a nei a, basketball inelna sang berah hian match khata point a score hnem ber ṭum a tawng - a match hnuhnung zawkah point 51 a lo nei tawh bawk. Portland team zingah a zawna match hnih chhung point 50 aia tam nei thei hmasa ber a ni hial.

Mavericks tana inkhel bul ṭantu panga ten point 10 chuang an nei thei vek. Luka Doncic (25points) Tim Hardaway Jr. (24points) ten thawh hlawk zual mah se an khingpui Lillard ropui zan a nih avangin an hnathawh hi a thamral.

Western Conference table-ah Blazers hi pariatna an ni mek a, playoff khel thei chinah an awm - an chung chiahah hian Mavericks an awm thung. An conference-ah hian Los Angeles Lakers chu a chung berah an awm chiang tawh.

Inkhel dangah Eastern Conference hmahruaitu Milwaukee Bucks chuan Washington Wizards lakah 126-113 in hnehna an chang. Bucks pawh a chung berah an awm chian tawh avangin an thiampuipa Giannis Antetokounmpo chu tun hnaiah an chhawr rim lo, Wizard lakah pawh minute 10 chauh a inlan.

Nimin zing inkhel dangah Portland Trail Blazers leh Bucks bakah hian - Phoenix Suns, Boston Celtics, Sacramento Kings leh San Antonio Spurs te chuan hnehna an chang ve bawk.