Arsenal neitu pakhatin Ram lei nan £500m a hmang!

Arsenal neitu nihna nei zinga mi pakhat Stan Kroenke chuan Texas-a ram (ran vulhna hmun) 510,527 acres a zau lei nan pound maktaduai 500 (Rs49,40,64,22,880.00) teh meuh mai a seng! Player thar lakluh nana sum hmang tam ṭhang lo Gunners fan-te chuan he thil hi an helh hle.

American sumdawng hausa tawntaw Kroenke hian United States-ah ram 865,000 acres zeta zau a nei tawh tihna a ni a, hei hi Los Angeles khawpui let thuma zau a nih bakah New York khawpui let li leh a chanve zeta zau a ni.

Kum 68-a upa Kroen-ke hian ram zau tak tak 11 lai a nei tawh a, khawvela ram ropui bera ngaih United States-ah ani aia ram nei zau chu mi pariat chiah an awm tawh.

Tun hnaiah Arsenal hian Real Madrid aṭanga Mesut Ozil lei nan pound maktaduai 42.5 an hman bakah Barcelona aṭanga Alexis Sanchez lei nan pound maktaduai 35 an hman bak chu transfer lian tham an nei lo. Season ṭan dawna an lakluh keeper Petr Cech chu pound maktaduai 10 man vel chauh a ni.

Gunners fan

an lungawi lo

North London club Arsenal fan tan an hotupa chet dan hi lungawi lohna tham a ni a, an ngaihdan leh hmuh dan chu Twitter lamah an tarlang nasa hle.

"Stan Kroenke chuan ram lei nan pound mak-taduai 500 a hmanga, transfer sum kan hman na chu a hriat e,"

"Arsenal tana Kroenke hnathawh chu hei hi a ni,"

"Club neituin hetiang zat ram lei nan sum a hmang a nih chuan nipui transfer hunah player thar leina tur kan nei leh dawn lo,"

"Kroenke-a'n ram lei nan pound maktaduai 500 a hmang maw? Arsenal fan-te harh a hun e," tih te chu fan lungawi lo au hla langsar a ni.

Khawvel mi hausa zingah Kroenke chauh hi hetianga zawnga sum hmang nasa hi a ni bik lo a, India pa hausa tawntaw Mukesh Ambani pawh a bang bik lo.

Cricket club Mumbai Indians dintu kum 58-a upa Ambani hian Mumbai-ah pound maktaduai 687 (Rs 67,95,79,21,114.82) hu In a nei a, he In hi khawvela mimal In sum hman tamna ber nia ngaih a ni.