Copa del Rey Barcelona chelhtu Valencia an tla

Nilaini zan khan Copa del Rey semifinal second leg-ah Gary Neville-a'n Valencia-a a mualphona belhchhahtu Barcelona a lo mikhual a, Catalan club lakah hian a naute chak pui zo lo mah se 1-1 in an inhnehtawk.

Nou Camp-a an inhmachhawn ṭumin Barcelona hi 7-0 in an lo chak tawh a, league match-a chak hmel la hmu lo Neville-a mualphona belhchhahin a awm a, Copa del Rey final luh an beiseina a bo nghal bawk.

Mestalla Stadium-a inkhelah erawh mualneitu Valencia-in first half-a Alvaro Negredo goal khung hmangin hma an hruai a, Barcelona-in an sut lawk theih loh avangin Valencia hi chak tur angin an lang hman.

Mahse, hun tawp nan minute ruk chauh a awm tawh tihin Barca substitute Wilfrid Kaptoum a inlar a, an si phurh sutna goal a khung. Hun tawp thlengin goal dang a lut tawh lo a, team pahnih hi goal khat ve ve khungin an ṭin.

Neville-a tan Barcelona an hnehtawk hi inchhuanna tur a awm lo - Luis Enrique-a'n a player ṭha rual chawlh hahdamtirin player naupang a chhawr a, khelmual chhungah Lionel Messi, Luis Suarez leh Neymar-te hmel hmuh tur a awm lo.

Catalan club tan Valencia an inhnehtawkpuina inkhel hi record thar an siamna a ni a, match 29 chhung tlawm hmel hmu loa an kaltluan avangin Spanish club zinga tlawm hmel hmu loa kaltluang rei ber an ni.

Barcelona-in inkhel pahnih belhkhawmah 8-1 in hnehna an chang a, final-ah nizana semifinal lehlama Celta Vigo leh Sevilla inkhela chak zawk zawk an hmachhawn ang.

Hmabak

Valencia-in Inrinni zan-ah La Liga match khel turin Espanyol an mikhual dawn a, Neville-a tan chetsual nawn a thiang tawh lo.

Barcelona an hmachhawnna inkhela a player rinrawl ṭhenkhat chawlhtirtu Neville chuan, "Tunah chuan Inrinni a kan inkhel tur chiah kan ngaihtuah tawh a, Espanyol kan hmachhawnna tur inkhel hi a pawimawh em em a ni," a ti.

Neville chuan inkhel chung­chang sawi nghalin, "First leg-a kan result avangin boruak duhawm lo tak hnuaiah kan khel a, mahse ka player-te'n ropui takin kan khel a, chak kan phu zawk a ni," tiin draw result aia ṭha an phu thu a sawi.

Neville chuan sawi chhun­zawmin, "Barcelona kan hma­chhawn­naah player naupang zawk kan chhawr a, Espanyol kan hmachhawn hunah harhvang takin kan inkhel thei dawn a ni," tiin a player ṭhenkhat a chhawr loh chhan a sawi fiah.

Chak mamawh

Valencia a enkawl hnua league match-a chak hmel la hmu lo Neville chuan, "Inrinnia kan inkhel turah hian chak ngei kan ngai a, he rilru pu chung hian keimah pawh ka infuih phur a ni," tiin Espanyol lakah tlawm a tum lo.

Neville chuan relegate lam a ngaihtuah loh thu sawiin, "Division hniam lama tlak thlak hi ka rilruah pawh a awm lo. Kan boruak a
ṭha lo tih ka pawm a, mahse kan dinhmun duhawm lo tak aṭanga kan team khai chhuah hi ka chak a, ka khai chhuak bawk ang," tiin a inring tawk hle.

Khawiah nge fan-te?

December 2-a Valencia-in an manager atan Gary Neville an puan hnuah English defender hlui hian December 7-ah training hmasa ber a nei a, an training lai en tur ringawtin fans sang engemaw zat an pungkhawm.

Thla hnih a liam a, Valencia khelmual Mestalla Stadium-ah Copa del Rey semifinal an khel. Mipui 55,000 lenna stadium-ah mipui 16,200 chiah an pungkhawm a, hei hian Gary Neville-a dinhmun thui takin a hril.

Mipui tlem chhan hi first leg-ah chiang taka an tlawm vanga fan-te'n beiseina an neih tawh loh vang a nih rualin manager Neville-a laka fan-te lungawi loh vang tih hi a langsar zawk chu a ni.

Manchester United defender hlui chuan, "Stadium-a lokal fan-te hnenah lawmthu ka sawi a, fan ṭhenkhatin lokal an duh lo a nih pawn an duhthlanna a ni," tiin inkhel entu tlem chu a sawisel duh lo.

Kar hmasaa Real Betis an hneh loh ṭuma fan-te auh el hial tawk Neville-a'n fan-te lakah erawh beiseina a la nei reng.

Kum 40-a upa manager chuan, "Inrinnia kan inkhelh hunah erawh fan tam tak an rawn punkhawm ka beisei a, tun hma zawng aiin fan-te ṭawiawmna kan mamawh lehzual a ni," tiin fan-te chu Espanyol an hma­chhawn huna ṭawiawm turin a sawm.

Zam lo Neville

Valencia club chanchina an keeper ropui ber tih ngam Santiago Canizares chuan Barcelona laka a club hlui an mualpho ṭumin Gary Neville-a lo khak tawh a, English manager chu fan-te hnena ngaihdam dil chunga a hna bansan mai turin a ti.

Season tawp thlenga Valencia enkawl tura contract nei Neville erawh a dinna ngaiah a ding tlat. Sky Sports-a football pundit a nih lai pawha ṭawngkam thiam tak Neville hian, "Hna ka thawh ṭan hma hauhin min vuiliamna tur hi chu ziah lawk a ni tawh. Thla nga chhunga ka hnathawh en turin ka ti a, kar ruk chhunga ka hnathawh an thlir a ni," tiin a hna bansan nan chuan hma a la tih thu a sawi.