FA Cup West Brom-in penalty hmangin hnehna chang hram

Nilai zan khan FA Cup fourth round replay khelh a ni a, West Brom leh League One club Peterborough te chu hun pangngaiah 1-1 in an inhnehtawk a, Premier League club hian penalty-ah 4-3 in hnehna an chang.

Club pahnihte hi January 30 khan West Brom khelmualah 2-2 in an lo inhnehtawk tawh a, London Road-a an inkhelah pawh mualneitu Peterborough tana minute 55-na a Jon Taylor goal khung chu mikhual tan Darren Fletcher chuan minute 77-naah a sut a ni.

Minute 90 chhungin goal dang a lut tawh lo a, extra time minute 30 an khelh zawh hnuah pawh goal dang a luh tawh loh avangin penaty hmangin last 16 lut tur chin fel a ngai.

Penalty shootout-ah West Brom tan Ben Foster a che ropui hle a, English keeper hian Martin Samuelsen leh Lee Angol te penalty pet a dan sak a ni. Khawvela football knockout tournament upa berah hian kum 2008 hnua a vawi khat nan a zawnin fifth round an lut. Tony Pulis a naute tan inkhelh pangngaia goal khungtu Fletcher chuan penalty a hlah thung.

Eng nge an sawi?

Peterborough boss Graham Westley chuan, "Tu tan pawh penalty hi chu pet goal loh theih a ni a, Martin Samuelsen leh Lee Angol te pawhin an tihsual aṭangin an inzir ang. Tunah chuan league lamah rilru kan sawr bing tawh dawn a ni," a ti.

West Brom manager Pulis chuan, "FA Cup inelna hi a hlu a, team tin mai hi kan inbei tawk viau zel. Hei hian British football ropuina pholang a ni. Beisei kan la neih na Cup-ah hian a ṭha thei ang berin kan kal zel ang," tiin a sawi.

Thawhlehni zan khan fourth round replay hi khelh a lo ni tawh bawk a, West Ham chuan Liverpool lakah 2-1 in hnehna an lo chang tawh bawk. FA Cup last 16 hi February 20, 21 leh 22 khian khelh leh tur a ni ang.