Lyon hnehin PSG-in quarterfinal lut

French Cup champion lai Paris Saint-Germain chuan an nomawi humhim ngei an tumna kawngah harsatna an la tawk lo. Nilaini zan khan Lyon lakah hnehna changin quarterfinal an lut.

Coupe de France-a inkhelah hian PSG tan Zlatan Ibrahimovic chuan goal hnih a khung a, midfielder Adrian Rabiot chuan an chak nemngheh nan an goal thumna a khung ve bawk.

Sweden thiampuipa Ibrahimovic hi manager Laurent Blanc-a tan in-nghahna a ni chho zel a, tun season-ah inelna hrang hrangah goal 27 khung tawhin an club top scorer a ni mek.

Nimin khan PSG manager Blanc chuan kum hnih dang cham chhun-zawm turin contract thar a ziak. Kum 50-a upa manager hian kum 2018 June thla thleng Coupe de France-ah hun a hman belh dawn tihna a ni.

Last 16 inkhel dangah Bordeaux chuan 2-1 a hma an hruai zet hnuah Nantes lakah 4-3 in an tlawm let thung.

Nizan khan French Cup last 16 hi khelh chhunzawm a ni a, Marseille leh Trelissac an inhmachhawn. He inkhelah hian Arsenal midfielder hlui Abou Diaby chu ni 506 chhung zet hliam vanga a inkhelh theih loh hnuah Marseille tan a inlan ve leh beisei a ni.