Bayern Munich tan Lewandowski goal hnih a tawk

Robert Lewandowski goal hnih khung hmangin Bayern Munich chuan Vfl Bochum lakah 3-0 in hnehna an chang a, German Cup semifinal an lut.

Nilai zana Bochum khelmuala inkhelah Bayern tan Lewandowski chuan minute 38 leh 90-naah goal a khung a, Thiago Alcantara chuan goal khat a thawh ve bawk.

Poland international Lewan-dowski hian Allianz Arena-ah a vanglai a hmang chho mek zel a, tun season-ah a club tan inelna hrang hrangah match 34 a khelh tawh aṭangin goal 34 a khung tawh a, inkhelh apianga goal khat khung ziah ang a ni.

Bochum defender Jan Simunek chu Arjen Robben a tih tluk vangin hnawhchhuah nghal a ni a, Dutch forward penalty hlawhchhuah hi Thomas Muller-a'n goal-ah a chan tir thei lo thung.

Bayern coach Pep Guardiola chuan, "Bochum khan an khel
ṭha hle a, goal hmahruai kan khung hma kha chuan inkhelh a harsa hle. League leh Cup inelna chu a inang lo a, 0-0 a result neih mai hi a hlauhawm ṭhin. Chutih rualin ka naute inpekna erawh hmuh hmaih theih a ni lo thung," a ti.

Inkhel dangah Hertha Berlin chuan second division club Heidenheim lakah 3-2 a hnehna changin semifinal an inhlangkai ve bawk. Thawhlehni zan khan Borussia Dortmund leh Werder Bremen-te chuan quarterfinal an lo paltlang tawh bawk a ni.

German Cup semifinal hi April 19 leh 20 khian khelh a ni dawn a, Bayern Munich leh Werder Bremen te an in hmachhawn ang a, semifinal leh lamah Hertha Berlin leh Borussia Dortmund an inkhel bawk ang.