Vawiin tlai dar 1:30-ah MPL5 Playoff Luangmual FC Vs Chhinga Veng FC

Mizoram Premier League Season 5 khel tur team pasarih a chiang tawh a, Playoff hmangin Luangmual FC leh Chhinga Veng FC te'n hmunruak pakhat an inchuh ang.

Vawiin tlai dar 1:30 hian Lammual-ah Luangmual FC leh Chhinga Veng FC ten MPL5 Playoff 1st Leg an khel dawn a, February 15 hian 2nd leg khelh a ni leh bawk ang. Minute 180 chhunga goal khung tam zawkin season tharah MPL an khel dawn a, 'away goal rule' hman tur niin vawiin inkhel hi Luangmual tan home match a ni.

Luangmual FC ṭantute chu Zomuanthanga Stand leh Zohminga Zote Stand-ah ṭhut tur a ni a, K. Kawla Stand leh S. Malsawmtluanga Stand-ah Chhinga Veng supporter-te an
ṭhu thung ang.

Luangmual nge Ramhlun?

MPL4-a pasarihna chu Luangmual FC an ni a, MPL2 finalist hotuten an club chu Ramhlun South hnenah an hralh. 2015-16 season a la tawp loh avangin Luangmual neitute hi dang tawh mah se club hming thlak a la ni lo a, player pawh a ngai niin MPL5 Playoff-ah chuan Luangmual FC hming an pu ang. Season tawp rualin Luangmual FC a tawp ang a, season thar aṭangin local football-a club hlun hi Ramhlun FC tih a ni tawh ang.

Playoff Thlirletna

MPL ṭan a nih khan team pariatin MPL1 Playoff an khel a, team pali Aizawl FC, Reitlang FC, Chanmari FC leh FC RS An-nexe te playoff khel turin an tling.

MPL2 aṭangin tuna Playoff kalphung hi hman ṭan a ni a, MPL1-a pasarihna Luangmual FC leh MPL2 Qualifier-a pahnih-na Khawzawl FC ten MPL2 Playoff an khel a, Luangmual FC hi aggregate-ah 6-3 in an chak.

MPL3 Playoff-ah Chanmari West leh Bethlehem Vengthlang FC te an inkhel a, Playoff awm tawh azawnga hmuhnawm ber a ni. MPL2 pasarihna West Warrior an vannei a, 3-2 in hnehna an chang hram.

MPL4 Playoff-ah Retilang FC leh Upper Republic FC te inkhelin minute 180 chhungin goal 11 zet a lut a, MPL3 pasa-rih--na Reitlang FC 6-5 in an chak.

Playoff thlirletin MPL club an la chesual ngai lo a, hei vang hian Chhinga Veng hian history an thlak a nih ngawt loh chuan season thara MPL khel tur chu Luangmual FC an ni.

Beisei phak lo

Luangmual FC-in MPL4-ah chak loin bul ṭan mah se match hnihnaah Mizoram Police an hneh a, team boruak a ṭhat zui avangin semifinal khel thei dinhmunah an ding chho. Amaherawhchu Aizawl FC laka goal 7 an chhuah hnuah in-siamṭhat an harsat a, transfer an hman ṭhat loh bawk avangin Phase 2-ah an talbuai takzet. Round 14-ah Luangmual FC hi tla thei dinhmunah an ding a, Bethlehem Vengthlang FC-in Mizoram Police an draw zarah MPL Playoff khel theiin an inham tang hram.

Chhinga Veng FC-in beisei an phak bik lo, Aizawl FC Academy hneha First Division League an champion hnuah MPL5 Qualifier an khel a, tling tura beisei an ni. Amaherawhchu qualifier Project Veng FC leh Champhai United an hneh hnuah Ramhlun North an hneh lo a, hun ṭha an bawhpelh avangin MPL khel turin Playoff-ah an chak ngei ngei a ṭul phah.

An match hnuhnung lama beisei pha lo ve ve inkhel turah hian Luangmual FC hi player thlirin an ṭha zawk. Luangmual midfielder Lalchhanchhuaha chu MPL4 Best Midfielder nominee-ah telh a ni a, ani bakah midfielder pahnih Lalthazuala (Puitea) leh F. Lalmuansanga (Puitea Fanai), defender K. Lalthlahlova (Patea), keeper Malsawmdawngzela leh for-ward B. Malsawmzuala te hi tawnhriat ṭha tak nei vek an ni.

Chhinga Veng hi an fitness a ṭha zawk ang a, fans pawh an nei ṭha ṭhin - chak an tum hle.

Eng nge an sawi?

Chhinga Veng FC coach Lal-remruata chuan, "MPL zawhna a rei tawh avangin Luangmual hi hriatthiam an har a, Keini tih theih chu a kaw tawpa ṭan a ni. Playoff khelh a ngaih avangin kan player-te an hnual lo a, rinkai lo zawk ni mah ila chak tumin theihtawp kan chhuah ang," tiin chak an tum thu a sawi.

Luangmual FC manager thar Anggu VL Hnamte chuan, "Kan hmuh dan chuan Chhinga Veng hian First Division an champion ṭuma an game kha an pha tawh lo. Ramhlun North-in an lehthal theih chuan keini pawhin kan hneh theih kan ring a, football-ah chuan vanduai theih ni mah se MPL-ah kan inpet tling ngei kan beisei," tiin a sawi.

Anggu chuan, "Luangmual FC hming la pu mah ila an au hla tur chu Ramhlun ang zawngin a ni ang. Playoff-ah Ramhluna veng hrang hrang awmte leh Luangmual ṭantute ṭawiawmna kan beisei," tiin a sawi.

Luangmual FC hi Chanmari FC assistant coach C. Lalmuan-puia'n a enkawl dawn a, Muana hian NECS Cup-ah Ramhlun South a champion pui tawh a, MPL kai thar Ramhlun North hi second division aṭangin first division-ah a kaipui tawh bawk.