Liverpool ticket man tih hniam a ni

Sunderland an hmachhawn
ṭuma Liverpool fan-te lungawi loh-na lantirin a ṭha zawngin nghawng a nei nghal a, Liverpool neitute chuan an ticket man tih hniam a nih tur thu puangin Reds fan-te hnenah ngaihdam an dil.

Liverpool neitu Fen-way Sports Group (FSG)-te hian season thar aṭang chuan an main stand-a ticket man chu £77 (Rs. 7,596) a nih tur thu an puang a, Reds fan-te chuan hei hi to uchuaka ngaiin kar hmasa khan Sunderland an hmachhawnna inkhelah minute 77-naah khelmual an chhuahsan.

Reds fan-te chet dan hi enliam theih a nih loh avangin Reds thuneitute an ṭhukhawm nghal chuk chuk a - an thutlukna chu ticket man tih hniam leh fan-te hnena ngaihdam dil a ni.

Fenway Sports Group (FSG) chuan Reds fan-te lungawi lohna chu an hriatthiam thu sawiin £77 man ticket chu a kal dan pangngaiin £59 (Rs. 5,820) a ni ang a, season ticket man to ber tura ruahman chu tih tawp a ni bawk.

Liverpool principal owner John W Henry, chairman Tom Werner leh FSG president Mike Gordon-te chuan thuchhuah inṭawm siamin, "Fan-te ngaihsak lo leh duham tak anga chhuah kan nih baka club aṭanga mimal hlawkna um anga sawi kan ni hi pawi kan ti a, an sawi lo ang chiah zawk kan ni tih hi fan-te'n an hriat kan duh a ni," tiin mimal hlawkna an um loh thu a sawi.

FSG chuan Liverpool chu sum siam nana hman an tum loh thu leh an sum tam tak an sen ral zawk thu an sawi a, Liverpool enkawltu an ni thei chu an inchhuan thu leh football khawvela ropui taka chawisan an tum thu an sawi a, Liverpool fan-te an rilru an tihnat saknaah ngaihdam an dil bawk.