Harsa takin Halep a chak

Thawhlehni zan khan Simona Halep chuan Covid-19 len hnua a match hmasa ber a khel a, world number 2 hian Polona Hercog chu 6-1,1-6,7-6 (3) a hnehin Prague Open-ah last 16 a lut.

Player pahnih an inkhel tawk a, set khat ve ve an lak hnuah a chak zawk tur chinfel a ngai. Set hnuhnung berah hian 5-3 in a hniam zawk a, a khingpui service chhuhsak let lehin match point pathum a hmuh hnuah a tlang.

Halep hi kar hmasa khan Palermo Ladies Open-ah inlan a tum a, mahse hripui leng vanga inkaihhruaina dan khirh tak vangin a inlan thei lo. February thlaa khelh zawh tak Dubai Tennis Championship hnuah a inkhel leh ṭan chauh a ni a, thil a awlsam vek bik rih lo.

Kum 28 mi Halep hi US Open-ah a inlan a nih chuan seeded pakhatna a ni thei dawn. Mahse, Romanian nula hian New York-ah a kal ngei dawn em tih a la sawi chiang thei lo, tun kar tawpa Prague Open khelh zawhah a tihchian tur thu a sawi.