Hart-a'n Pellegrini tan ṭhahnem a ngai

Manchester City goal-keeper Joe Hart chuan an manager kal chhuak tur Manuel Pellegrini tan a tawp thlenga an theihna sang ber hlan sak a duh thu a sawi.

Chile coach Pelligrini hian sesson tawp rualin City hi a chhuahsan dawn a, a result chhiat vang ni hran loin ani aia ṭha zawk tura ngaih Pep Guardiola chu Eitihad stadium-a a rawn luh dawn vang a ni.

Pellegrini hian City kum thum a enkawl chhungin Premier League title bakah League Cup a lo chawi tawh bawk a, tun season-ah inelna hrang hrang paliah champion an la beisei vek bawk.

England international Hart chuan, "Pellegrini hi mi ṭha tak a ni a, mimal chuan kan inmil reng lem lo. Mahse, club tana a ṭhahnemngaihna leh hnathawh avang hian min kalsan tur hi chu a uiawm khawp mai. Season tharah chuan bung thar kan kai dawn a, tunah chuan kan manager neih lai tan hian a tawp thlenga bei tura kan in seh ruh a hun," tiin a sawi.

City hi league-ah palina an ni mek a, League Cup final lut tawhin Champions League leh FA Cup-ah pawh last 16 an inhlangkai tawh bawk a ni.