Lakers an chak nawn

NBA Finals Game 2-ah Los Angeles Lakers chuan Miami Heat 124-114 in an hneh a, game hnih an lak hnuah LeBron James chuan Kobe Bryant chhungkaw tan champion ngei an duh thu a sawi nawn.

Match hmasa ang bawkin Lakers tan James leh Anthony Davis an ṭangkai. James-a'n point 33 neiin Davis-a'n point 32 bakah rebounds vawi 14 a la bawk. Tukin hian game 3 khelh a ni a, Lakers hian 2010 hnua NBA title hmasa ber la turin vawi hnih chak chauh an mamawh tawh.

January thla khan helicopter chesuala thi zingah Lakers legend Bryant leh a fanu Gianna te an tel ve a, club chhungkuain chhiat an tawh kumah champion theihna kawng a inhawng mek. Game 2-ah hian Bryant hriatreng nan 'Black Mamba' tih chuanna jersey an ha.

Bryant leh Lakers chung-chang sawiin James chuan, "Lakers tana sulhnu ropui leh chhinchhiah tlak tak hnutchhiahtu tana match kan khel thei hi ka lawm. Tun ṭumah hian Bryant chhungkaw tan hlawhtlinna chan ngei kan duh a ni," a ti. Lakers hian 'Black Mamba' tih inchhutna jersey ha chunga match an khelh hoah chak loh an la nei lo.

Lakers thiampuipa James leh Davis an inkawp fuh a, a tir aṭanga a tawp thlengin an team hi dinhmun hlauhthawn awmah an din pui lo. Heat lamin hliam vangin center Bam Adebayo an chhawr thei lo a, forward Jimmy Butler (25 points, 13 assists) leh Kelly Olynyk (24 points) te khel ṭha mah se chak nan a tawk zo lo a ni.

Chak lo mah se Heat player Tyler Herro tan ni chhinchhiah tlak a ni. American guard hi kum 20 leh ni 256 mi chauh ni chungin inkhel bul ṭantu zingah a tel a, Magic Johnson (1980) record khumin NBA Finals a inkhel bul ṭan thei naupang ber a ni.