Spurs leh Saints ten player inthleng

Tottenham chuan Southampton midfielder Pierre-Emile Hojbjerg an lalut fel a, hetihlai hian Saints hian Spurs aṭangin defender Kyle Walker-Peters an la nghet ve thung - player pahnih hian season nga daih ve ve contract an ziak.

Kum 25 mi Hojbjerg man zat hi pound maktaduai 15 a ni a, tun nipui bazar chhunga Jose Mourinho player lakluh hmasa ber a ni. Kum 23 mi Walker-Peters pawhin season chawhnu lam loan hmang a khelh tawhna hi pound maktaduai 12-in a zawm.

Denmark international Hojbjerg chuan, "Spurs ka zawm thei hi ka lawm, inkhelh hun ka nghakhlel takzet. Inbiakna kan nei a, coach-in a khelh duhdan leh min chhawr a tum dan a sawi aṭang khan ka lungawi nghal vek. Coach leh player ṭha tak kianga khelh chu a nawm ka ring," a ti.

Mourinho rawn lan hnuah Walker-Peters tan khelhna hmun a awm lo a, season hmasa pawh khan khelhna hmun zawngin a chhuah a ngai tawh. English defender chuan, "Saints khelh dan leh ka khelh dan phung a inang, hun nuam tak ka hmachhawn chhunzawm ka beisei," a ti.

Premier League season liam ta khan Tottenham hi table-ah parukna an ni a, season tharah Europa League an khel ang; Southampton pawhin season duhawm pangngai tak hmangin 11-na dinhmun an luah.