BCCI-in sorkar phalna an hmu

BCCI-in Covid-19 vanga India rama Indian Premier League an khelh theih loh avangin UAE-a khelh turin ruahmanna a siam a, sorkar laipui chuan India rama cricket thuneitu sang ruahmanna hi a phalsak.

IPL vawi 13-na hi March 29, 2020-a khelh ṭan turin ruahmanna siam a ni a, amaherawhchu coronavirus vangin ruahmanna hunah khelh theih a ni lo. Hemi a nih avang hian IPL Governing Council chuan ruahmanna thar siamin September 19 aṭangin UAE-ah khelh ṭan a ni ang a,  November 10-ah final khelh a ni ang.

UAE-ah hian khawpui pathum Dubai, Sharjah leh Abu Dhabi-ah te khelh a ni ang. IPL 2020-ah hian Chennai Super Kings, Delhi Capitals, Kings XI Punjab, Kolkata Knight Riders, Mumbai Indians, Rajasthan Royals, Royal Challengers Bangalore leh Sunrisers Hyderabad te an awm. India leh China buaina avangin IPL Governing Council chuan main sponsor Chinese brand Vivo an thlak dawn a, tunah hian sponsor thar an zawng mek.