Northeast Derby-ah Aizawl FC coaching staff thar fiahna
Shillong Lajong FC-in kum 2011 khan Mizoram rawn tlawhin I Day Football nomawi nen Aizawl an chhuahsan a, Mizo club zingah ngamtu an awm lo. Kum nga dang a liam leh meuh chuan Mizoramin I League club a nei ta a, vawiin chawhnu dar 2:00 hian Rajiv Gandhi Stadium, Mualpuiah Aizawl FC leh Shillong Lajong ten I League match an khel dawn.
Aizawl FC-in an match hnuhnung berah East Bengal an hneh lo a, tun season-a an result ṭhat loh avangin head coach Manuel Retamero an ban zui bawk. Spanish coach aia an lakluh Jahar Das-a'n North East Derby aṭangin MPL champion a enkawl ṭan dawn a, Bengali coach rual hian Aizawl FC-in I League kai puitu coach K. Malsawmkima chu coaching staff zingah an telh a, vawiin inkhel turin ngaihven a hlawh phah hle.
Shillong lam
Shillong Lajong-in Mizo paruk Lal-rammuana, Zodingliana Tochhawng, Joseph Lalfakzuala, Jacob Lalrawngbawla, Isaac Vanmalsawma leh Samuel Lalmuanpuia te an kawl a, Ramthar Veng tlangval Rammuana'n starting eleven a chang ang.
Lajong coach Thangboi Singto chuan, "Rammuana hi Shillong league-ah top scorer a ni tawh a, player ṭha a ni. Season liam ta khan I League a khel tawh a, tun season-ah hming a chher chho ang. Rammuana hi starting eleven-ah a tel dawn a, Mizo dang erawh ka la sawi thei lo. Adinga hi squad-ah a awm dawn a, amaherawhchu a inhliam vangin kan la dim ang. Joseph pawh a khup an zai hnuah a dam chho tawh a, kan fimkhur erawh a la ṭul," tiin Mizo player chungchang a sawi.
Shillong Lajong hian an mualah hneh loh an tawng lo - Mumbai FC an draw hnuah Sporting Goa leh Salgacoar te an hneh. Amaherawhchu khualmualah Lajong an che ṭha lo, Bengaluru leh East Bengal chiang takin an hneh lo.
`Chutihrualin Lajong hian Aizawl FC aiin foreigner an nei ṭha zawk a - Shillong club hi Brazilian duo Uilliams leh Fabio Pena bakah Nigerian midfielder Penn Orji leh Japanese defender Yusuke Yamagata te khelhna a ni.
Mala hoin
Aizawl FC coach Jahar Das chuan, "Spanish coach Retamero kha coach
ṭha tak a ni a, India rama ka tawnhriat ang a neih ve loh kha a vanduaina chu a ni. Shillong Lajong lakah hian result
ṭha tak kan neih kan beisei a, chumi tur chuan Mala a pawimawh ang. Mala hi I League-a Aizawl FC kai puitu a ni a, club tana a pawimawh tih hi sawi mawi chawp mai mai a ni lo a, thudik a ni. Chuvangin Aizawl FC hian Mala theihna hi kan hmang ṭangkai ang," tiin ZoFooty coach of the year nilai K. Malsawmkima a pawimawh dawn tih a sawi.
Aizawl FC-in coaching staff thar an neih miau avangin an player luhtir dan pawh a dan a rinawm a, a dan dan erawh vawiin hian a chiang dawn a, Shillong Lajong hi Aizawl FC tan Manuel Retamero awm loh hnua an match hmasa ber tur a nih avangin a pawimawh takzet.
Mipui lam
Mualpuiah I League inkhel entu an tam ziah a, Aizawl FC ṭantu an tam em tih erawh zawhna awm thei tak a ni. Match thum khelh tawhah inkhel entu Mizo mipuiin player-te an la au phur tawk lo.
Veng leh veng inkhela ṭantu nei ṭha Armed Vengin an veng tlangval Lalram-chullova tan an la pen chhuak lo a, Republic Vengin an veng chawimawitu F. Lalrinpuia an la ṭawiawm lo a, a tawi zawngin Mizo player-te'n an phu ang tawk ṭantu an la hmu lo. Tun season hian Aizawlah I League match li chauh a awm tawh dawn, Mizo mipui ṭhanharh a hun e.