MBBA League Division I Final Series Tied 1-1 Zaninah Game 3 - VR4 Vs Hollow

Mizoram Super League-in tualchhung basketball hmel a ti danglam tih chu Khatla TBL leh Zarkawt BCA te'n MSL1 Final an khelh khan a chiang, Hawla Indoor Stadium leng lo mipui an pungkhawm.

MSL1 kha inelna a nih rualin relegate an awm loh avangin inenchhinna tih pawhin a sawi theih. February 25-a ṭan tur MSL2-ah erawh parukna an relegate dawn a, panganain playoff an khel thung ang. Zanin dar 8:00 hian Chawnpui VR4 leh Hollow ten Division I final an khel ang a, a chak zawkin season tharah MSL3 an khel ang.

Div I Final

Game 1-ah Hollow-in VR4 lakah 86-80 in hnehna an chang a, overtime meuh khelh a ngaih avangin an intluktawk tih zep rual a ni lo.

Game 2-ah Hollow lamin point 87 hial nei pha mah se VR4-in point 104 zet an score avangin Division I champion a la hriat loh a, MSL3 khel tur hre turin Game 3 khelh a ṭul phah bawk.

Thlirna Tawi

MSL leh Division I khaikhin chu a rem lo a, amaherawhchu Divi-sion I final hmasa pahnih hi MSL game tam takin hmuhnawm lamah an pha lo ang.

Naupang tha za rual Hollow BSSP 'full court pressure' a hmuhnawm a, chutihrualin Game 2-ah erawh an hmanraw ṭha ber hi an chak lohna chhan a ni. Chawnpui VR4 player-te'n tawnhriat an neih ṭhat zarah Game 3 an thleng thei hram a, chak loh an hrehna chu final tihmuhnawmtu a ni.

Hollow tan Ṭhazuala leh Zonuna te an hmuhnawm a, VR4 tan Mawia, Thanmawia leh Ruatdika te an langsar a, an vai hian MSL khel atana awhawm tak vek an ni.

Rs 20 chauh

Game 3 en man hi Rs. 20 a ni dawn a, basketball tui tan chuan en ngei chi a ni. Hollow ṭantu zingah Bungkawn mipui an tam a, an au rual thiam ṭhin hle. VR4 pawhin Chawnpui leh Republic Veng
aṭangin ring taka thawm nei tham ṭantu an nei bawk.

Hollow coach Samuel Lalthla-muana chuan an tihsual vanga Game 2-a an chak loh thu a sawi a, Game 3-ah erawh an chak ngei a rin thu a sawi tel bawk. VR4 coach R. Lalmuanpuia chuan, "Republic Veng tan MSL club neihna hun ṭha a ni a, vengchhung mipui ṭawiawmna kan ngen," tiin Vanglaini palai a hrilh. Chawnpui leh VR4 ten kum khat chhung inremna an siam chu a tawp tawh a, MBBA League zawh rualin Republic VR4 hming a pu tawh ang.