Liverpool fan-te'n chawlh an tum lo

Premier League club Liverpool neituten ticket man an tih hniam thu puang mah se Reds fan-te'n chawlh mai an la tum lo a, ticket man a tlawm zawk zel theih nan hmalak chhunzawm an tum.

Kar hmasa Premier Lea-gue-a Sunderland an hmachhawn ṭumin Liverpool fan-te'n ticket man to chungchanga an lungawi lohna lantirin minute 77-naah khelmual an chhuahsan.

Nilaini khan Liver-pool neitu Fenway Sports Group chuan Reds fan-te lungawi lohna an hriat-thiam thu leh ticket man an tih hniam thu an puang a, Liverpool fan-te hnenah ngaihdam an dil bawk.

Mahse, Liverpool fan ruhkawl intelkhawm Spion Kop 1906 chuan nakin zel atan Liverpool leh England-ah ticket man chu mipui vantlang mil tawk a nih zel theih nan club neitute dawr an tum thu an sawi.

Spion Kop 1906 hotu zinga mi James Cooke chuan, "Football ngainatu tam takin kan hmalakna hi an thlawp a, tun hmaa kan hmalaknate chu bengngawng bula sawi ang chauh a ni ṭhin. Ticket man an tih to hma pawh khan club thuneitute nen kan indawr a, an ruahmanna chu fan-te'n an duh loh tur thu kan hrilh chungin an ngaithla lo a ni," tiin fan-te'n dinhmun pawimawh an chan zel theih nan hmalak an tum.

Cooke chuan sawi chhunzawmin, "Football-a kan inhuatna leh elna te chu kan dah kiang tur a ni. Fan-te kan inlungrual a ṭul a, kan intelhkhawm phawt chuan kan beisei ang chhanna kan hmu dawn a ni," a ti.

Liverpool hian Pa-thianni zan dar 7:35-ah Aston Villa chu khual-mualah league match khel turin an lenchilh ang.