Chhinga Vengin MPL5 khel dawn?

Mizoram Premier League Season 5 Playoff match hmasa zawk chu nimin khan Lammualah khelh a ni a, Chhinga Vengin Khawzawl tlangval Vanlallawma goal ropui hmangin Luangmual FC chu 1-0 in an hneh.

Thawhṭanni tlai dar 1:30-ah MPL5 Playoff second leg khelh a ni dawn. Luangmual FC-in season thara Ramhlun FC hminga MPL khel turin minute 90 chhung insiamṭhatna hun an nei a, Chhinga Veng FC pawhin an tum ram MPL khel turin darkar khat leh a chanve chhung an hman ṭhat a la ṭul bawk.

Tawnhriat vs Fitness

Luangmual FC-in player-te'n physical fitness an neih ṭhat tawk loh bakah match fitness tlachham bawk mah se tawnhriat nei ṭha player an kawl nual avangin MPL5 Qualifier khel zo hlim Chhinga Veng nen an inkhing tawk hle.

Goal hmaah Luangmual aiin Chhinga Veng an hlauhawm zawk a, Aizawl DFA first division club tan India sub junior camp-a awm Jacob Vanlalhlimpuia (Puipuia) chuan hnai tak aṭangin a khung lo. MPL4 pasarihna Luangmual FC-in goal khung ngei ngeina tur chance nei lo mah se Rosangzuala leh Lalrinsanga te'n an hun ṭha neih an bawhpelh ve bawk.

Minute 83-naah Chhinga Veng FC-in goal class bik an khung a, Phulpui tlangval R. Lalṭanpuia cross chu Vanlalawma'n mawi zetin a khung a, goal dang a luh belh tawh lo.

Eng nge an sawi?

Luangmual FC coach Anggu VL Hnamte chuan, "Kan chak loh chhanah chuan kan fitness kan chhuanlam ber a, team pahnih danglamna chu goal ropui bik a ni. Fiamthuin kan sawi a, Chhinga player khan vawi 100 pawh chance nei leh se khatiang kha chuan a khung tawh lo ang. Goal khata kan chak loh vang hian kan hnual lo a, second leg-ah lehthal ngei kan tum ang," tiin beisei an la neih thu a sawi.

Chhinga Veng manager Lalthanzama Vanchhawng chuan, "Ramhlun North kan hneh loh hnuah vengchhung mipuiin min la phatsan lo a, Luangmual FC kan hmachhawn ṭuma ṭha taka min ṭawiawm avangin an chungah kan lawm takzet. Kan player-te khelh danah kan lawm a, goal khat kan khung chauh ni loin minute 90 chhung khan kan khel ṭha zawkin ka hria," tiin chak an phu zawk thu a sawi.