Nomawi inchuh Arsenal vs Leicester; City vs Spurs

Pathianni zan Premier League inkhel results hian season tawpa champion nomawi chawi tur a hril thui thei dawn. Tlai dar 5:30 hian Emirates Stadium-ah league hmahruaitu Leicester City an leng lut dawn a, team pahnihte inthlauhna hi point nga a ni mek. Zan dar 9:45-ah Man-chester City chuan anni aia point khat chauha sang Tottenham an lo mikhual dawn bawk a ni.

Liverpool leh Manchester City hneh hlim Leicester tan Arsenal hi an huphurhawm hran lo ang. North London club tan league match 18 an inkhelh aṭanga vawi 12 an hneh theih Foxes hi an huphurhawm dawn bik loh avangin team pahih hi an inhlau lo tawn dawn tih a chiang.

Sanchez vs Vardy

Nikum September thla khan King Power Stadium-ah Arsenal leh Leicester te hi an lo inkhel tawh a, Alexis Sanchez hattrick hmangin Gunners-in 5-2 in hnehna an chang.

Barcelona forward hlui hi khawvel footballer zingah Premier League, Serie A leh La Liga-a hat trick siam thei hmasa ber a ni nghe nghe.

Chile international hi tun season-ah hliam vangin thla hnih chhung inkhel thei lo mah se a dam leh tawh a, goal 10 a khung tling leh der tawh. Ani bakah Mesut Ozil chu Arsenal goal nawrna tur thapui a ni leh ang.

Foxes hmatawng Jamie Vardy hi tun dinhmunah chuan England-a striker langsar ber pawl a ni a, league goal 18 khung tawhin ani aia khung tam an awm rih lo. Tun season-a goal 22 chhuah tawh Gunners tan England international hi ngaimawh tham a tling.

Leicester manager Claudio Ranieri hian tun hnai an league match pangaah starting XI a thlak kual miah lo a, zanin pawh hian a ti danglamin a rinawm loh. Kum 2015 May thla khan Arsenal manager pawhin league match vawi rukah player ngai hlir a luh zawn tir tawh.

Pellegrini tan City

Manchester City manager Manuel Pellegrini-a'n season tawp rualin Etihad Stadium a chhuahsan dawn, keeper Joe Hart chuan an manager kal chhuak tur tan nomawi chawi a duh thu a lo sawi tawh.

Tun dinhmunah Man City hi nomawi pali chawi thei dinhmuh an ding mek. League-ah point 47 hmu tawhin palina an ni mek a, zanina an khingpui tur pahnihna ni mek Spurs nen hian point khat chauha an inthlauh avangin City hian hnehna an chang a nih chuan an lehpel daih dawn a ni.

Mahse, Tottenham boss Mauricio Pochettino leh a naute hian chuti mai chuan City hi point an pe bik lo ang. Spurs hi tun season-ah league match 25 khelh tawh aṭangin vawi thum chiah an la tlawm a, team 20 zingah goal chhuah tlem ber niin goal 19 chiah an la chhuah a ni.

Premier League season kal meka goal chhuah tlem ber Spurs tlarhnung su hawng tur hian City tan Sergio Aguero a rawn ding ngeiin a rinawm. Argentina international hian a club tana a match hnuhnung pangaah goal sarih a khung thei. Tlarhnung pui ṭha leh tlarhma hriam tak inhmachhawn tur hi inkhel hmuhnawm a ni dawn.