Copa del Rey Final-a inhmachhawn tur a chiang ta

Copa del Rey final-a Barcelona an luh hnuin Sevilla-in an hnung an zui ve leh ta a, Ningani zan khan Spanish Cup semifinal second leg-ah final lut turin Celta Vigo chu 2-2 in an inhnehtawkpui.

Sevilla khelmuala semifinal first leg an khelh ṭumin Sevilla hian 4-0 in hnehna an lo chang tawh a, inkhel hmasa nena belhkhawmin Unai Emery-a naute hi 6-2 in an tlang ta a ni.

First leg-ah 4-0 in chak lo mah se Celta Vigo player-te an phur loh phah lo. Liverpool striker hlui Iago Aspas chuan mualneitu team hi 2-0 in hma a hruai pui a, Celta fan-te an phur hman hle.

Mahse, Sevilla tan Ever Banega-a'n goal khat a sut hnuah Celta Vigo tan John Guidetti-a'n penalty a pet goal lo a, mikhual team tan Yevhen Konoplyanka-a'n an goal hnihna a khung leh bawk avangin Celta Vigo tan Spanish Cup final luh beiseina a tawp zui ve ta nghal a ni.