Sunderland khelmualah United an mualpho

Manchester United boss Louis van Gaal-a'n fan-te lawm zawng result a hlawh chhuak hleithei lo - Inrinni zan khan Premier League table mawngphah lama talbuai mek Sunderland chu 2-1 in an hneh lo a, nomawi chu sawi loh Champions League beisei tur pawhin an dinhmun a chhe ta hle.

Sunderland tan erawh United hneh hi beisei-na siam saktu a ni a, Liverpool an inhnehtawk pui hnua Manchester United an hneh leh tak avangin Premier League-a inhamtan beiseina an nei sang hle.

Inkhel chu

Stadium of Light-a inkhelah mualneitu team tan Wahbi Khazri chuan minute 3-na lekah goal hmahruai a khung a, United tan Anthony Martial chuan minute 39-naah a sut.

Team pahnihin goal dang an khung thei lawk lo a, an inhnehtawk mai dawna a lan hnuin Khazri corner pet chu vengtu nei lo Lamine Kone-a'n United goal-ah a tauh a, buai nuai karah Anthony Martial-a'n pet chhuah a tumna lamah United keeper David de Gea-a fuh a, a goal. United tan sut turin hun a tam tawk tawh lo a, team tenau nia ngaih Black Cats lakah an tlawm.

United defender Matteo Darmian chu first half-ah hliam vanga lak chhuah a ni a, United-in an tlarhnung player pasarih hliam an neihna chiah a ni.

Sunderland lawmna

Black Cats-in January transfer an hmang fuh a, an goal hmahruai khungtu Tunisia forward Khazri hi Bordeaux aṭanga an lakluh niin Liverpool nen an inhnehtawk ṭumin Jermain Defoe goal khung tur a siamsak bawk.

Sunderland goal hnihna luh theih nana ball tauhtu Kone hi Lorient aṭanga an lakluh a ni a, Black Cats player tharten an team tan an thawhhlawk hle.

Van Gaal a buai

United-in league match 26 an khelh hnuah point 41 an hlawh chhuak a, Premier League-a match 26 an inlan hnua point an hlawh chhuah tlem ber ṭum a ni.

Manchester United manager Van Gaal chuan ,"Champions League khelh a harsa tawh dawn a, Sunderland hneh loh hnua ka rilrua lo awm chu season thara Champions League khel tur chuan Europa League nomawi chawi a awlsam zawk ang," tiin league-a palina nih aiin Europa League nomawi chawi a awlsam zawk tur thu a sawi.

Dutch manager chuan sawi chhunzawmin, "Chelsea leh Sunderland lakah point nga kan hloh a, tun ang huna point hloh atan chuan a tam a ni. Ka player-te hnenah Champions League la beisei reng turin ka fuih a, kawng awlsam zawk erawh Europa League nomawi chawi a ni," a ti.

United hian palina Manchester City chu point rukin an phak lo mek a, nizana inkhel City result a zirin an inthlauhna hi a la danglam leh thei bawk.

Inkhel dang

Southampton-in khualmualah Swansea City chu Shane Long-a goal hmangin 1-0 in an hneh a, an match hnuhnung parukah tlawm hmel an hmu ta lo. Swansea tan erawh manager thar Francesco Guidolin-a hnuaia match nga an khelh hnua tlawm hmel an hmuh hmasak ber a ni.

West Brom-in league match ruk an khelh hnuah chak hmel an hmu ve ta a, Salomon Rondon-a goal hmangin Everton chu khualmualah 1-0 in an hneh.

Bournemouth khelmualah Stoke City an che ropui a, Mark Hughes-a naute hian Giannelli Imbula, Ibrahim Afellay leh Joselu-te goal hmangin Cherries chu 1-0 in an hneh. Stoke City tan January-a pound maktaduai 18.3-a an lei Imbula-a'n goal a khung hi thu lawmawm a ni.

Watford tan captain Troy Deeney chuan goal hnih khungin Selhurst Park-ah Crystal Palace chu 2-1 in an hneh a, Emmanuel Adebayor chuan Palace tana a goal hmasa ber a khung bawk.

Norwich City-in an khelmuala West Ham an hma-chhawn ṭumin 2-0 in hmahruai hman mah se Hammers tan Dimitri Payet leh Mark Noble-te'n an sut a, 2-2 in an inhnehtawk.