Mohun Bagan chakna Jeje

Inrinni zan I League inkhelah Mizo tlangval Jeje Lalpekhlua a langsar a, khual-muala Bengaluru FC 2-0 a an hnehna inkhelah Kolkata club tan goal hma-hruai a khung.

Inkhel ṭan
aṭanga minute 7-na lekah Jeje kan hmu nghal a, Hnahthial tlangval hian Katsumi Yusa ball cross Bengaluru defender Curtis Osano-a'n a lo dan per chu a pet phak lo chiah chiah.

Mizo tlangval hian chance dang a neih chhun-zawm leh a, mahse Japanese midfielder Katsumi Yusa free-kick chu bar chung chiahah tauhin a goal teuh hle.

Minute 73-naah erawh Jeje a chesual nawn tawh lo. India international striker hian mawi taka Shankar Sampingiraj a bum hnuah goal a khung a, goal mawi bik a ni.

Minute 90 pelh hnuah Sony Norde-a'n goal dang a khung ve leh a, Bengaluru tan chhan letna hun a awm tawh lo.

Bangalore club tan Lalchhuanmawia leh Beikhokhei te'n inkhel bul an ṭan a, Lengpui tlangval Chhuantea hi minute 61-naah a yellow card pahnihna avangin hnawhchhuah a ni.

Bengaluru FC coach Ashley West-wood chuan Mizo tlangval Chhuantea hnawhchhuah a ni chu a hriatthiam loh thu a sawi a, referee chuan ṭan lam a nei niin a sawi.

Siaha tlangvala Beikhokhei erawh khelmual chhungah a hmuhnawm a, second half ṭan tir lama a goal khung loh erawh a ui hle ang.

Bengaluru FC coach Ashley Westwood chuan, "Jeje, Pronay Halder leh Prabir Das-te kha South Asian games khel tura koh an ni a, engvanga khelmual chhungah khan inlan nge an nih ka hre lo. Keini chuan Udanta Singh an koh avangin kan kal tir a, vawiinah khan kan mamawhzia chu in hmu," tiin a lungawi lo hle.