MSL khel turin Hollow BBSP an tling Coach Ela hnathawh a rawn lang chhuak ta
Inrinni zanah Hollow BBSP-in Mizoram Super League Sea-son 3 khelh theihna ticket hlawh chhuak turin Chawnpui VR4 chu 81-76 in an hneh a, season tharah Mizoram chhunga basketball inelna sang ber MSL an khel dawn.
Hawla Indoor Stadium-ah MBBA League Division I Final Game 3 khelh a ni a, inkhelh entu an ṭhahnem hle. Point 39 zet score-tu Ṭhazuala'n court chhungah Hollow team a kaihruai a, court pawn aṭangin coach Samuel Lalthlamuana'n a player rawlthar rualten an tihtur ṭheuh an tih theih nan cool takin a naute a thunun a, Hollow ṭantuten an player-te an au phur thiam bawk.
Ṭhazuala Show
Hollow-in Bungkawn rawl-thar Ṭhazuala an nei a, VR4 lamin Chawnpui tlangval Mawia an nei thung. Game 3-a guard ṭha pahnih danglamna chu Ṭhazuala a khel ṭha tluan a, Mawia erawh third quarter-ah a mawi tawk lo a - inkhel result a nghawng tih loh theih loh a ni.
Ṭhazuala hun harsaah a rin-tlak a, point 39 a score zinga pawimawh ber chu third quarter-a 66-61 a nih laia 3-points a khung kha a ni. Bungkawn rawlthar hian point thum pawimawh tak hi khung lo se Chawnpui hi an tho chhuak thei hial ang, chutihrualin a khung hma chiaha 'time out' call-tu coach Ela'n a hna a tlin viau bawk.
Hollow jersey number 7 Ṭhazuala hi basket neih kawnga a pawimawh bakah ṭhiante siamsak (assist) leh rebound neih lamah pawh player langsar a ni pha zel a, MBBA lamin Most Valuable Player hranpa thlang lo mah se mipui hmuhah chuan Bungkawn rawlthar hi MVP a ni. Chutihrualin team inelnaa champion nomawi chu mimal thawhrah ringawt a ni thei lo, a teammate R-a (Bungkawn), Makima (Nursery) leh Zonuna (Ramthar) te hnathawh hmuh hmaih a thiang lo.
Coach thawhrimna
Hollow champion-a ropui lai tak erawh nomawi hi pawisaa lei a ni lo a, thawhrimna hmanga lei a ni. Player tam zawkin college an la thleng pha lo a, class 12 la pass lo hi a tam zawk niin an vaiin coach Samuel Lalthlamuana aṭanga inzir an ni.
Veng inelnaa Chanmari lo champion pui tawh ṭhintu Samuela chuan, "Kan player-te hi middle school an kal lai
aṭanga ka lo enkawl tawhte an ni hlawm a, tun dinhmun kan thleng thei hi ka lawm takzet a ni. MSL kai chho thei team hi chu an la awm zel dawn a, amaherawhchu naupang ruala kaichho thei hi chu an awm lawk ka ring lo. MSL erawh tun aiin la harsa dawn a, tun aia thawhrim a ṭul dawn ni," tiin an team danglamna a sawi.
Halftime-a a thusawi chung-chang sawiin NIS coach Ela chuan, "Thu danglam ka sawi lo. Inkhel boruak a san tawh
ṭhin avangin player-te hian hrilh tawh hnu hi an theihngilh ṭhin a, chuvangin kan game plan chiang takin ka hrilh nawn leh ṭhin. Tun inelnaah chuan Ṭhazuala a khel ṭha tluan a, kan champion erawh team pumpui thawhrah a ni," tiin a sawi.
Hollow-in season tharah MSL an khel dawn a, VR4 erawh Mizorama basketball inelna sang ber khel turin playoff-ah MSL2-a pangana an hneh ngei a ngai thung. MSL2 hi February 25 aṭanga khelh ṭan tur a ni.