Real chak zanah Gary Neville-a pawr
La Liga-ah Real Madrid-in an nomawi beiseina an chhi nung ve zel a, Inrinni zan khan an khelmualah Athletic Bilbao chu 4-2 in an hneh.
Gary Neville-a'n league match sawm a naute a kaihhruai hnuah lawmna tur a nei ve ta a, Valencia-a enkawl hnua La Liga-a an chak hmel hmasa ber hmu turin Espanyol chu 2-1 in a hneh.
Ronaldo bawk
Santiago Bernabeu-a in-khel-ah Real Madrid tan Cristiano Ro-naldo bawk a langsar a, Por--tu-guese forward ropui hian inkhel ṭan aṭanga minute 3-na lek-ah an hmahruaina goal a khung.
Mikhual team tan Javier Eraso-a'n Ronaldo goal hi sut mah se Real-in team lian zia an chhuah chhunzawm a, James Rodriguez, Toni Kroos, Raphael Varane leh Ronaldo-te hmangin goal dang an khung leh. Athletic tan hun tawp dawna Gorka Elustondo-a goal tauh luhin awmzia a nei thui lo.
Ronaldo-a'n goal hnih a khung leh tak avangin tun season La Liga-ah bik goal 21 a khung tawh a, inelna hrang hrangah vawi 30 inlan tawhin goal 32 a khung tling ta.
Mikhual team lakah Real an inchhuang thei bik lo. Tun season-a che ṭha tak Artiz Aduriz a hlauhawm a, Athletic striker rinrawl hian vawi tum vel lai chance hlauhawm tak tak a nei a, Real an vannei.
Zidane-a thukhawchang
League match paruk a naute a kaihhruai hnua tlawm hmel la hmu lo Zinedine Zidane chuan, "Vawiinah hian chanchinthar thehdarhtu ṭhenkhat chu Ronal-do chet ṭhat leh ṭhat loh thlithlai tur ringawtin an rawn kal a, mahse khelmual chhungah ṭha takin a chhang a ni," tiin goal hnih khungtu Ronaldo a fak.
Valencia an chak
Gary Neville-a'n Espanyol an mikhual hmain chak an mamawh thu a sawi a, khelmual chhungah a nauten a duh ang result an pe.
Mestalla Stadium-a inkhel-ah mikhual team-in goal an khung hmasa zawk a, minute 52-naah Oscar Duarte chuan Espanyol tan goal a khung.
Mahse, Valencia an talbuai rei lo. Alvaro Negredo-a'n an si phurh sutna goal a khung hnuah Real Madrid aṭanga loan-a an hawh Denis Cheryshev chuan an chakna goal a khung a, Valencia 2-1 in an chak.
Neville a lawm
Kum 40-a upa Neville chuan, "Kan chak avangin ka lawm a, mahse hei hi chu a bul ṭanna chauh a ni. Fans leh media-te'n thil tam tak an sawi tih ka hria a, ka hrethiam a ni. An dinhmunah hian ding ila kei pawh in an sawi ang tho hi ka sawi ang," tiin amah sawiseltute a chhang let duh lo.
Neville chuan sawi chhun-zawmin, "Zaninah fan-te'n min ṭawiawm tlat a, 1-0 a kan chak loh lai pawha min ṭawi-awmna khan min ti lawm a ni. Zanin kan khel khan khelh ṭhat ringawt niloin goal khung pawi-mawh zia min hrilh a ni. Lawm avanga chi aina hun a ni lo a, result
aṭangin inrintawkna kan neih ka beisei," tiin an chak chuan team-ah phurna nasa tak a pek a beisei thu a sawi.
English manager hian assis-tant manager turin Rafa Benitez-a'n Valencia leh Liverpool-a enkawl laia assistant atana a lo hman tawh Pako Ayestaran chu assistant manager ni turin a la lut thar bawk.
Lawmpuitu dangdai
Liverpool defender hlui Jamie Carragher chuan, "Mark Robins hi Spanish ṭawng chuan Denis Cheryshev tihna a ni. I ti ṭha e Gary" tiin twitter lamah a ziak.
Kum 1990 FA Cup third round-ah Manchester United-in khatih hunlaia team ṭha Nottingham Forest an hma-chhawn a, an chak lo a nih chuan league table-a 15-na ni mek United manager Alex Ferguson an ban dawn niin an ziak. Mahse, substitute Mark Robins chuan United chakna goal a khung a, Alex-a dinhmun a humhim.
Reds legend Carragher hian Valencia chakna goal khungtu Denis Cheryshev chu Gary Neville-a hna humhim saktu angah a ngai a ni.