Bundesliga Dortmund-in Hannover hneh hram

Inrinni zan Bundesliga inkhelah Borussia Dortmund chuan Henrikh Mkhitaryan goal khat khung hmangin an mikhual Hannover an hneh hram.

Signal Iduna Park-a inkhelah minute 57-naa Henrikh Mkhitaryan solo goal chu team pahnih daidangtu a ni a, Dortmund hian point 48 hmuin league hmahruaitu Bayern Munich chu point ngain an phak lo mek. Mahse, nizan inkhelah Pep Guardiola nauten FC Augsburg laka an result a zirin an inthlauhna hi a danglam leh ang.

Thomas Tuchel a naute hian Marco Reus freekick pet aṭangin hma an hruai teuh hle a, mahse German international ball pet hian goal bar a per dawp.

Hemi hnu hian Armenia captain Mkhitaryan chuan yard 20 a hla aṭangin goal awmchhun a khung. Kum 27-a upa Mkhitaryan hian tun season-ah league goal riat a khungna chiah a ni.

Borussia Dortmund coach Tuchel chuan, "Inkhelh ṭan tir minute 20 chhung khan kan khel ṭha zual hle a, goal pawh khung awm tak kan ni. Reus freekick kha lut ni ngat se chuan inkhel a thlak danglam viau in ka ring bawk. A khaikhawm nan chuan point thum kan hmu hi a ṭha hle," a ti.

Inkhel dangah Bayer Leverkus-en chuan 2-1 a Darmstadt hnehin league table-ah pathumna dinhmun an luah a, Hertha Berlin erawh Stutt-gart laka 2-0 a an tlawm avangin palinaah an tla thla thung.

Manager kum 28 chauha upa Ju-lian Nagelsmann enkawlna hnuai-ah Hoffenheim chuan point khat an hlawh chhuak a, Werder Bremen nen 1-1 in an inhnehtawk.