Serie A Napoli hnehin Juventus-in hma an hruai

Juventus chuan Inrinni zan khan an mikhual Napoli chu hun tawp dawna Simone Zaza goal khat khung hmangin an hneh a, Serie A hmahruaitu thar an ni leh ta.

Juventus Stadium-ah inkhel ṭan hmain mikhual Napoli hi Juve aiin point hnihin an sang zawk a, minute 90 an inkhelh hnuah Massimiliano Allegri naute chu point khatin an sang tawh zawk. A zawna a vawi nga nana league title la turin an dinhmun a ṭha leh tawh hle.

Serie A champion lai Juven-tus hian season bul ṭan ṭha lo mah se beisei phak bakin hma an sawn chak a, tunah hian league match-ah a zawnin vawi 15 chhung hnehna an chang tawh a, hei hi an club record a ni. Napoli lakah pawh hian substitute Zaza chuan minute 88-naah goal awmchhun a khung.

Napoli hian tlarhmaah league top scorer ni lai Gonzalo Higuain an hmachhuan a, league goal 24 khung tawh Argentina international hian Juve kulhpui Gianluigi Buffon a paltlang zo lo thung a ni.

Italian keeper ropui Buffon hian kum 2016 bikah clean sheet vawi sarih a nei tawh a, European league lian zual panga zingah ani aia record nei ṭha an awm lo.

Tun season-ah Juve hian match 25 khelh tawh aṭangin point 57 hmuin table-ah hma an hruai a, pahnihna Napoli hian point 56 an hmu thung. Juve hian team 20 zingah goal chhuah tlem ber dinhmun luahin goal 15 chiah an la chhuah a ni.

Eng nge an sawi?

Juve manager Allegri chuan, "Team ṭha pahnihin inkhel hmunawm leh hautak tak kan hmachhawn a, a tu zawk pawh khan league hmahruaitu nih kan phuin ka hria. Napoli kha khel ṭha zawkin lang mah se Zaza goal khung bakah Paulo Dybala khung loh kha ngaihtuah chuan chak chu kan phu zawkin ka hre bawk. Match 13 khelh hmabak kan neihah hian a ṭha thei ang bera khelh chhunzawm kan tun ang," a ti.

Napoli manager Maurizio Sarri chuan, "Inkhelh hmuh-nawm tak a ni a, team pahnihin goal khungna hun ṭha erawh kan nei tlem hle. A pawi ta ber chu hamrik hnuhnung ber a rik hma a goal kan chhuah zeuh kha a ni. Juve khelmuah hian inkhelh a harsa a, Europe-a club lian tam tak tan pawh result
ṭha neih harsatna hmun a ni. Ka ngaihdan chuan Juve nen khan kan intiat tawk hle," tiin a sawi.

Inkhel dangah table lai-hawla mi Empoli chu an mikhual Frosinone lakah 2-1 in an tlawm a, Chievo leh Sassuolo te chu goal khat ve ve khungin an inhnehtawk bawk.