North East Derby-ah goal a lut lo

Aizawl FC-in coaching staff thar hnuaia an match hmasa berah point khat an hlawh chhuak a, Inrinni khan North East Derby-ah Shillong Lajong nen goal awm loin an inhnehtawk.

Aizawl FC captain David Lalrinmuana chu hero of the match-ah thlan a ni a, Zemabawk North tlangval hian DSK Shivajians nen an khelh ṭumin thlan a lo ni tawh bawk.

Rajiv Gandhi Stadium, Mual-puia I League inkhelah hian MPL champion coach Jahar Das-a'n 4-5-1 formation tho hmangin player-te khelh dan a siksawi hret.

Aizawl FC hotututen coaching staff thar hnuaiah beiseina sang tak nei mah se relegation battle lama an elpui Lajong an draw avangin point thumin Shillong club an pha lo chhunzawm zel a, Thangboi Singto hote hi Mizo club aiin match khatin an khel tlem bawk.

Inkhel dul

Tlai dar 2:00-ah ni a la sat ṭhat avangin team pahnihin tha tho takin an khel lo a, goal khung tuma innawr aiin goal an venhim ve ve avangin inkhel a hmuhnawm loh - fans pawh ṭum dang aiin an tlem.

Indian Super League-a in-hliam Zodingliana To-chhawng chu tun season-a a vawi khat nan Lajong tan a inlan a, Armed Veng tlangval hian starting eleven chang nghal mah se ngai a la awh lo tih a lang. Lajong forward Lalrammuana'n Aizawl FC tlarhnung a su hawng thei lo a, darkar khat hnuah Ramthar tlangval aiah Tlungvel midfielder Jacob Lalrawngbawla luhtir a ni.

Khualmuala point la hlawh-chhuak lo Lajong-in point hloh an tum lo a, defence pali pui turin captain Aiborlang Khongjee leh Nigerian midfielder Penn Orji te an dah a, goal venhim kawngah player pahnih hi an ṭangkai hle.

Chak mamawh zawk Aizawl FC tan attacking midfield hna chelhtu Alfred Kemah Jaryan a khel ṭha a, tlarhmaa mal tlat F. Lalrinpuia goal hmaah a hriam tawk lo. Liberian striker hian minute 8 chiah a awm tawh tihin goal a khung a, amaherawhchu referee-in Alfred hi goal a khung hmain Nimdorjee Tamang lakah a foul-ah ngaiin a pawm sak lo.

MPL champion tan H. Lal-muankima chu I League-ah vawi khatna atan a inlan a, Laldampuia pawh kan hmu ta - goal erawh an thawk chhuak lo. Mizo club tlarhnung a phui ṭha a, Lalramchhullova leh a hoten Lajong Brazilian player Fabio Henrique leh Uilliams Souza Silva te an chelh hneh hle.

Eng nge an sawi?

Aizawl FC coach Jahar Das chuan, "Goal khung ringawt ngaihtuah thei kan ni lo. Kan tum ber chu relegate loh a ni a, chumi mil chuan kan khelh a ṭul a ni. Goal kan chhuah lo a, kan player-te khelh dan pawh a ṭha thawkhat viauin ka hria," tiin a sawi.

Bengali coach chuan, "Team ṭha danglamna chu foreign striker a ni a, kan Japanese striker Atsushi Yonezawa hi chu a ṭha tawk lo a ni. Striker ṭha goal khung thei tur kan zawng mek," a ti.

Shillong Lajong coach Thang-boi chuan, "Khualmualah point kan hmu ta a, kan lawm khawp mai. Aizawl FC hi RG Stadium-ah chuan khelh an harsa lehzual a, team ṭha Bengaluru pawh in vawi khat chiah goal an khung. Shillong-a Sporting Goa nen kan inkhelh khan Odafa nen kan inbia a, Aizawlah chuan thâwk a harsa a, duh angin a khelh theih loh tih a sawi. Ka player ṭhenkhatte pawhin Odafa tawn ang tho hi an tawng a, chuvangin point khatah hian kan lungawi," tiin a sawi.

Thlirna

Aizawl FC hian Mumbai FC chiah hmachhawn loh an nei ta a, hneh pakhat chiah an la nei. Team pakua an awm a, DSK Shivajyan hi tla thei lo an ni si a, team pariat zinga pakhat an tla ang.