MPL5 Playoff Vawiinah MPL khel tur a hriat dawn

15th February, 2016

Mizoram Premier League Season 5 khel tur zawnna Playoff second leg chu vawiin tlai dar 1:30 hian Lammualah khelh a ni dawn.

First leg-ah Chhinga Vengin Khawzawl tlangval Vanlallawma goal ropui hmangin Luangmual FC an hneh a, MPL khel turin Aizawl DFA First Division League champion dinhmun a ṭha hle.

Away Goal Rule

Playoff second leg hi Chhinga Veng tan home match a ni dawn a, Luangmual FC hi 2-1 a an chak a nih chuan 'away goal rule' hmangin season tharah MPL an khel ang.

Chhinga Veng tan MPL khel turin draw a tawk a, penalty shootout kan hmu dawn a nih chuan Luangmual FC hi 1-0 a an chak an ṭul thung ang.

Hnai si, hla si

Ramhlun South-in MPL club neih ngei tumin Luangmual FC an lei a, Chhinga Veng an hneh leh si loh chuan Mizoram football inelna lian berah club an nei dawn lo. Ramhlun South-in MPL club nei turin minute 90 chhung insiamremna hun an nei a, an insiam ṭha thei lo a nih chuan an tum ram thleng turin a tlem berah kum khat an la mamawh ang.

Chhinga Vengin MPL luh theihna hun ṭha hmasa chu qualfier-ah an bawhpelh tawh a, MPL khel tura point khat chauh an mamawh tawh hnuah Ramhlun North an hneh lo. Chhinga Veng hian an tihsual aṭanga inzirin vanduai nawn an tum lo ang.

Eng nge an sawi?

Luangmual FC manager Anggu VL Hnamte chuan, "Kan fitness a ṭha tawk lo tih chu kan hria a, amaherawhchu Chhinga Veng hmaah hian kan ṭhat theih ang bera inlan kan tum. Inrinni khan Lammualah kan practice a, kan hun neih tlem ngaihtuah chuan hma pawh kan sawn hle," tiin MPL khelh theih a inbeisei thu a sawi.

Chhinga Veng FC manager Lalthan-zama Vanchhawng chuan, "Chetsual nawn tawh loh kan tum, player-te'n chak loh hrehawmzia an hria a, theihtawp chhuahin MPL khelh ngei tumin kan khel ang. Kan veng mipuite ṭawiawmna kan ngen nawn leh a, anni hi kan player 12-na an ni," tiin Vanglaini palai a hrilh.

MPL Playoff-ah hian Mizoram Premier League-a pasarihnain Qualfier-a pahnihna an la hneh vek a, Chhinga Veng FC hi playoff-a MPL club hneh thei hmasa ber ni turin an dinhmun a ṭha hle.