Hnehna nen Serena a lo kir

Hun rei tak chhung tennis an chawlh lailawk hnuah an khel chhunzawm leh mek a, world number 1 hlui Serena Williams pawh a match hmasa berah a chak nghal - American star hian a match lehpekah a unaunu Venus Williams a hmachhawn ang.

Thawhlehni zan khan Top Seed Open-ah Serena hi a inlan a, darkar hnih leh minute 15 chhungin Bernarda Pera chu 4-6, 6-4, 6-1 in a hneh hram. Venus pawhin Victoria Azarenka lakah 6-3, 6-2 in hnehna a chang ve bawk.

Thla ruk hnua a match khelh leh hmasa berah Serena a kaltluang nghal bik lo, set hmasa ber a hloh nghal. Set hnihnaah pawh game li ve ve an lak hnuah 0-40 in a hniam, a service hloh se chu chak lo thleng thei a ni.

Mahse, tawnhriat ngah Serena a tho chhuak a, harsa taka set a lak hnuah set hnuhnung ber chu nuamsa takin a la zui. February thlaa khelh Fed Cup hnua inlan leh chauh a nih avangin tun hma lam chu a phak rih lo tih a chiang.

Grand Slam vawi 23 champion tawh Serena chuan, "Khatiang aia ṭha khan khel thei tur ka ni, tihsual leh fuh tawk lo ka neih hnem kha ka tuar. Hun rei tak hnua inkhel leh chauh ka nih avang erawh chuan ṭha taka khelh nghal kha a harsa ve bawk," a ti.

American star hian tun thla tawpa khelh tur US Open-ah pawh inlan a tum thu a tichiang tawh. New York khawpuiah player langsar ṭhenkhat an kal lo a nih chuan Serena tan nomawi chawi theihna kawng a inhawng zau deuh turah a ngaih theih.

Inkhel dangah kum 16 mi Coco Gauff pawhin hnehna a chang, world number 53 hian a khingpui Caroline Dolehide chu 7-5, 7-5 in a hneh ve bawk. Nizan khan seeded pahnihna Aryna Sabalenka nen an inhmachawn leh a, result erawh kan hre hman lo.