Chelsea-in Newcastle an sawp

Premier League champion lai Chelsea-in Inrinni zan khan Newcastle United 5-1 in an sawp a, Dutch manager Guus Hiddink-a hoten match sawm chhung hneh loh an tawng tawh lo.

Stamford Bridge-a inkhelah Blues hian ṭan aṭanga minute 17 chhungin Diego Costa, Pedro leh Willian te hmangin goal thum an khung nghal a, second half-ah Barcelona aṭanga an lakluh Pedro hian goal dang khung belhin Bertrand Traore chuan Blues goal ngana a khung leh bawk. Newcastle mualpho lutuk tur hliah khuh nan Andros Townsend-a'n minute 90-naah goal khat a khung ve hram.

Blues goal hnuhnung ber khungtu Traore hi West Africa khawmualpuia ram pakhat Burkina Faso player Premier League-a goal khung thei hmasa ber leh awmchhun a la ni.

Chelsea captain John Terry chu minute 39-naah malpui na vangin lakchhuah a ngai a, nimin khan a hliam hi endik a ni. He thu ziah lai hian English defender chanchin kimchang hi hriat hman a la ni lo.

London club-in hma an sawn hret hret a, pawisa hmang tam Newcastle erawh tun season-ah khualmualah goal 5 vawi thum (Man City 6-1, Palace 5-1, Chelsea 5-1) an chhuah tlinna chiah a ni. Magpies hian league match vawi 26 an khelh tawh aṭangin goal 59 an chhuah a, anni aia chhuah tam chu Sunderland (50) chiah an awm.