Chawl thei kan ni lo - Alisson

Liverpool-in Premier League table-ah point 19-in hma an hruai fal tawh a, heti chung hian goalkeeper Alisson Becker chuan hahdam taka awm thei an la nih loh thu a sawi. 

Liverpool hian zanin dar 8:30-ah Southampton an mikhual dawn a, hnehna an chan chuan match 25 lekah point 73 an nei chho thei dawn - champion sawi ri pawh ni se a awm lo hran lo. 

Mahse, Alisson chuan, "Kan sawi fo ṭhin a, ka sawi leh ang. Match kan khelh leh tur zel chauh kan ngaihtuah. Saints nena kan inkhel tur chauh kan ngaihtuah a, hnehna chan tumin theihtawp kan chhuah dawn a ni," a ti. 

Khawvela goalkeeper ṭha ber pawl chuan sawi chhunzawmin, "Kan theihna kan hrechiang a, kan thlen theih chin pawh chiang takin kan hria. Mahse, a pawimawh ber chu a ṭha thei ang bera khelh zel a ni. 

"Premier League inelna hi a sang em em a, chawl thei kan ni lo. Theihtawp chhuaha kan beih zel a ngai dawn a ni," a ti a, point 19-a an san falna chu thlamuanna tur a la nih loh thu a sawi. 

Hetihlai hian Liverpool defender Morgan Boyes chuan kum hnih dang atan contract a ziah belh a, kum 18 mi Boyes hian Under 23 lamah a hun tam zawk a hmang.