Man United an chak, Rashford a inhliam
Manchester United-in FA Cup fourth round lut turin Wolverhampton Wanderers 1-0 in an hneh a, goal awmchhun hi Juan Mata-a'n a khung. Ole Gunnar Solskjaer-a hoten fourth round-ah Watford leh Tranmere Rovers chak zawk an hmachhawn ang.
Tun Pathianni hian Manchester United-in Anfield an tlawh dawn a, Marcus Rashford chu Wolves nen an inkhelh ṭuma a inhliam avangin Liverpool hmachhawn lo thei dinhmunah a ding. Nilaini zan inkhel dangah Cardiff City-in Carlisle 4-3 in an hneh a, Championship club Cardiff hi Reading nen an inkhel zui dawn.
Wolves daltu VAR
Manchester United-in FA Cup an ngai pawimawh tih an starting eleven aṭangin an an pholang a, keeper Sergio Romero tih loh chu hman ṭhan vek an ni a, Rashford erawh damchian loh vang chauha bul ṭan loah a ngaih theih.
Solskjaer-a hote hian Molineux-ah goal zawnah an pet thei lo a, Old Trafford-ah pawh mikhual Wolves-in bul an ṭha zawk. Minute 10-na lekah Neto hmangin Wolves-in hmahruaiah an inngai a, amaherawhchu VAR hmanga en a nih hnuah Raul Jimenez handball vangin pawm a ni lo.
Mexican striker Jimenez-a'n box chhungah United defender Harry Maguire, Brandon Williams leh Nemanja Matic te bum dualin chance ṭha bik a insiam a, keeper Romero-a'n a dansak. United pawh an khel chhe hran lo a, first half tawp hmain Fred-a through ball ṭha tak chu Daniel James-a'n goal zawnah pet mah se Wolves keeper John Ruddy-a'n a dang.
The Special 'Juan'
Manchester United kum 2014 khan player special 'Juan Mata' chu Chelsea aṭangin an lalut. Spanish midfielder talent nei ṭha zet hian ram leh club tana inelna lianah nomawi chawi vek tawh mah se United-ah erawh a 'special' hran lo.
Chutihrualin tun hnai match hnihah chuan a thiam la theihngilh loh tih a lang a, Norwich laka assist ṭha zet a neih hnuah Wolves nen United goal nawrna ber a ni a. First half-ah a ball pet ṭha zet Ruddy-a'n dansak. Minute 67-naah United-in counter attack hmangin an chhu let a, Anthony Martial-a'n ṭha zeta a lakchhuah hnuah Wolves offiside trap bumtu Mata chuan keeper Ruddy 'chip' khumin goal awmchhun a khung.
United bang 'Romero'
Manchester United-in keeper an neih ṭhatzia an sawi apiangin David de Gea hming a lam ri a, Argentine keeper Sergio Romero an lam hmaih tlangpui. An sulhnu thlir kirin Romero hian United hi Europa League, FA Cup leh League Cup-ah a champion pui tawh.
Hei chauh hi ni loin Romero hian United tana match 53 a inlanah clean sheet vawi 34 a nei a, goal 22 chiah a chhuah bawk. Chutihrualin Argentine keeper hian second keeper a ni dawn tih hre chungin Old Trafford a pan a, Liverpool nen pawh De Gea a inlan zawk ang.
An risk sual e
Solskjaer-a'n hnehna chan duhin minute 64-naah Marcus Rashford a luhtir a, tun season-a ram leh club tana goal 22 khung tawh striker hi inhliam vangin minute 80-naah a thlak. Norwegian manager Solskjaer chuan, "A damchian loh vanga awltir ka ni a, chak kan duh avangin kan luhtir a ngai. Goal-ah khan a inrawlh avangin khelmuala a luh khan awmzia a nei a, chutihrualin a inhliam na a nih chuan a nghawng a pawi khawp ang," tiin Liverpool nen khel lo thei dinhmunah a din thu a sawi.
FA Cup - Third Round Replay
January 15, Nilaini Zan
Manchester United 1 - 0 Wolverhampton Wanderers
MANU : Juan Mata 67'
Carlisle 3 - 4 Cardiff City
CAR : Nathan Thomas 7'; Harry McKirdy 51', 64'
CARC : Aden Flint 18', 48'; Josh Murphy 45'; Danny Ward 57'
FA Cup - Fourth Round
January 24, Zirtawpni Zan
Queens Park Rangers 1:30 AM Sheffield Wednesday
Northampton Town 1:30 AM Derby County
January 25, Inrinni
Brentford 6:15 PM Leicester City
Reading 8:30 PM Cardiff City
West Ham United 8:30 PM West Bromwich
Burnley 8:30 PM Norwich City
Coventry City 8:30 PM Birmingham City
Newcastle United 8:30 PM Oxford United
Portsmouth 8:30 PM Barnsley
Southampton 8:30 PM Tottenham Hotspur
Millwall 8:30 PM Sheffield United
Hull City 11:00 PM Chelsea
January 26, Pathianni
Manchester City 6:30 PM Fulham
Watford / Tranmere Rovers 8:30 PM Manchester United
Shrewsbury Town 10:30 PM Liverpool
January 27, Thawhṭanni Zan
AFC Bournemouth 1:30 AM Arsenal