Lazio-ah Immobile a nghet

European Golden Shoe dawngtu Ciro Immobile chuan amah ngaihventu club awm mah se chhuah tumna a nei lo a, sum tam zawk hlawh theihna tur pawh ni mah se tun dinhmunah chuan chhuah a tum lem lo niin a lang.

Season liam ta khan Italian forward hian Serie A-ah goal 36 ngawt a khung a, league top scorer a nih bakah European league lian panga zingah mimal goal khung hnem ber a ni bawk - a kum tam deuh tawh mahse club lian dangin lakluh an hreh lo.

Kum 30 mi Immobile chuan, "Tunah hian kum 2025 thleng daih contract ka nei, chumi ka hman zawh meuh chuan ka kum pawh a uaithla ve tawh hle ang, contract hmang zo ngeiin he hmunah hian hun tawp hman ka duh," tiin Lazio tana thu hriat nuam a sawi.

Immobile hian Premier League club hausak tum Newcastle United pawhin an dawr hman thu a sawi, mahse Magpies hi Saudi PIF-in lei an tumna a tlawlh leh rih a, an tum angin coach leh player pawh an lalut thei dawn ta lo.

Italian forward chuan, "Newcastle khan neitu thar an nei dawnin a lang a, khatih lai khan ka agent Alessandro Moggi pawh an rawn be hman. An beisei dan chuan Italian coach lak pawh an tum niin an sawi, an sawi zingah Massimiliano Allegri  leh Luciano Spalletti te hming pawh a ri.

"Amaherawhchu thil kha thui tak a kal lem lo, inbiakna pawh kan nei thuk lo. Lazio ka pan hma khan Napoli nen pawh kan inbe hman, Naples khawpui hi ka pianna a nih avangin khelh pawh ka hreh lo. Mahse inremna a awm thei lo a, tunah chuan ka rilru zawng zawng hi Lazio tan ka hlan tawh," a ti.

Immobile hi Italy tan pawh match 39 a inlan tawh a, ram tan hian goal 10 a khung. A hun hmasa lamah beisei angin ṭha chhuak lo mah se a kum tam hnuah hriat a hlawh zual, nakkuma European Championship an khelh hunah pawh ram tan innghahna a ni ang.