Services, Mizoram leh Uttarakhand an chak

National Football Championship for Santosh Trophy-ah Mizoramin chak hmel an hmu ta a, final round beiseina nei turin nimin khan Dadra and Nagar Haveli and Daman and Diu chu 5-0 in an hneh. Group E inkhel dangah team ṭha dang Services leh Uttarakhand te an chak bawk.

Guru Nanak Dev Univ Complex, Amritsar-a inkhelah hian Services hian Sikkim 3-0 in an hneh a, Uttarakhand hian Pondicherry 7-1 in an hneh ve bawk. Services leh Uttarakhand te hi match hnih khelhah an la chak ve ve.

Services an ṭha

Amirtsar-ah ruah a sur avangin ground a nal a, Services-in Sikkim lakah an game ṭha ber an khel thei lo chungin 3-0 in an chak.

Services tan captain Christopher Kamei-a'n goal hmahruai a khung hnuah Rahul leh Samir Murmu ten an khung belh. First half-ah 3-0 ni mah se second half-ah an khung belh lo.

Elpui tur Uttarakhand

Services chak vek ta se, pahnihna tiṭha pathum zinga tel tura Mizoram elpui tur chu Uttarakhand an ni. Uttarakhand hian nimin khan Pondicherry chu 7-1 zetin an sawp.

Uttarakhand hian match hmasa berah Sikkim an hneh a, Pondicherry zawhah hian DNH&DD an hmachhawn dawn. Mizoram an hmachhawn hunah chuan inrintawkna nasa tak an nei ang.

A behbawm

DNH&DD hi group E-a team nem ber an ni a, amaherawhchu mumal taka team inrem an ni thung. Nikum kha Santosh Trophy an khelh hmasak ber a ni a, kuminah ni 20 chhung residential camp an nei.

An theihna an hriat chian avangin goal khung aiin goal venhim an tum a, Pondicherry lakah pawh player 10-in point khat an hlawh chhuak. Mizoram pawhin an khingpui an hre chiang a, ṭan phat aṭangin attacking football khelh tumin player an rem.

Mizoram vice captain R. Malsawmtluanga a damlo a, game plan mila player siksawi bakah player theihna en nan Services laka starting eleven aṭangin Mizoramin player paruk ngawt an thlak.

Mapuia Show

Mizoramin DNH&DD lakah goal an khung mai thei bik lo a, chhun aṭanga khua a ṭhat avangin ground erawh zingkar lama lakah chuan ṭha tawh tak a ni.

Kelkang striker Mapuia'n minute 19-naah goal a khung hnuin minute 44-naah penalty aṭangin a khung leh bawk. DNH&DD lam hi an bet tawp a, Mizoram hian ball chang tam mah se goal chance siam an harsat.

Second half-ah DNH&DD bawkin an hna an tlin zawk a, Mizoram goal nawr an dang chat thei hle. Mizoramin game plan an thlak hlek a; Lalrinzuala, Johny Lalrinchhana leh PC Lallawmkima te luh hnuah an nawr na zual.

Minute 84-naah Lalbiakthanga Hmarin goal mawi bik a khung a, Mapuia pawhin hattrick siamna goal ṭha zetin a tauh goal. Injury time-ah Mapuia bawk hian keeper tihsual nangchingin a pet goal leh bawk.

Mizoram tan final round lut turin goal nga hi a ṭha tawk a, an match khelh hmabaka an chak vek chuan Arunachal Pradesh-ah an zin thei ang.