Ronaldo ropuina belhchhahin a awm zel

Portugal-in Euro 2024 khel dawn chiang tawh mah se Cristiano rilruah chawlh hahdam duhnain hmun a chang ve lo - Thawhṭanni zan khan Bosnia-Herzegovina nen an inkhelah a inlan ve leh a, goal hnih a khung leh ta.

Group J inkhelah Portugal hian 5-0 in Bosnia-Herzegovina hi an sawp a, Ronaldo hian minute ngana lekah penalty hmanga goal hmahruai khungin, minute 20-naah a chhunzawm bawk.

Edin Dzeko hoa khel Bosnia lamin a chhanletna tur an nei thei lo a, Portugal tan Bruno Fernandes, Joao Cancelo leh Joao Felix ten khung zuiin, awlsam takin hnehna an chang zui.

Hetihlai hian group J inkhel dangah Slovakia chuan 1-0 a Luxembourg hnehin, David Duris chuan inkhela goal awmchun a khung a, Slovakia tan nakkuma Germany zin turin beiseina a la awm ve zel.

A hming Ronaldo

Kum 38 mi Ronaldo-a'n goal hnih a khung leh ta a, Al Nassr forward hian ram tan match 203 khel tawhin goal 127 zet a khung ta a, a goal khung ang zat ram tana inlan thei pawh hi an tam lo!

Kum 2023 chhung ringawtin Ronaldo hian goal 40 a khung tling leh ta der a, kum 40 a hnaih tawh chung pawhin Portuguese forward hian goal khung a la bansan hleithei lo - kan la hmu dawn chauh niin a lang.

Bosnia-Herzegovina khelmuala goal hnih a khung leh tak avangin Euro 2024 qualifier khelh mekah Ronaldo hi top scorer a ni ta chiah bawk a, Belgium striker Romelu Lukaku nen goal kua ve ve an khung tawh - Ronaldo hian heti zat goal khung tur hian match sarih bak a mamawh lo.

He thu buatsaih a nih laia goal khung tam lama Lukaku leh Ronaldo hnaihtute hian goal ruk ṭheuh an khung a, Denmark striker Rasmus Højlund, Scotland midfielder Scott McTominay, France chhuanvawr Kylian Mbappe, Switzerland attacking midfielder Zeki Amdouni leh Norway innghahna Erling Haaland te an ni.

Portugal an vul

Group J-ah Portugal hian match riat khel tawhin hnehna an la chang fai vek a, goal 32 zet khungin an lamah goal hnih chiah a la lut - anmahni hnaih bertu Slovakia hian match riat aṭangin point 16 an nei a, Portugal-in an group-ah ro an rel hneh hle.

Slovakia tan Portugal hnungzui turin hmabak match hnihah point hlawhchhuah a tawk - an hnuai chiahah hian Luxembourg an awm a, anni hian point 11 neiin, match hnih tho khelh an hmabak mek.

Luxembourg hi match hnihah chak ve ve se, Slovakia hian match hnih aṭangin point khat chiah nei ta se, an point hmuh zat a inang dawn. Mahse, Slovakia hian head-to-head record an nei ṭha zawk a, an tlang thei ang.

Bosnia tan qualifier kaltlanga Euro 2024 khelh beiseina chu a tawp tawh a, mahse, UEFA Nations League ranking kaltlangin playoff an la khel thei dawn - beisei a la bo lo.