Baroda lakah Mizoram chak lo

Board of Control for Cricket in India (BCCI) hnuaia inelna Syed Mushtaq Ali Trophy neih laiah, nimin tlai khan Mizoram chuan an match pahnihna khelin, an khingpui Baroda lakah wicket rukin an chak lo.

Jaipuria Vidyalaya Ground, Jaipur-a inkhelah Mizoram lamin vuak hmasak an thlang a, over 20 chhunga run 97 siamin mi pasarih an out. Mizo tlangval Joseph Lalthankhuma chuan ball 29 aṭangin run 20 a siam a, ani bakah hian run 28 siamtu Mohit Jangra a che ṭha bawk.

Mahse, Mizoram lam target siam hi a sang tawk lo. Baroda lamin over 14 chhung leka mi pali chauh in hloh chungin an target an khum. Mizoram hian an match hmasa zawkah Chhattisgarh an ngam lo tawh bawk.

Ocotber 17, Ningani chawhnu dar 1:30 hian Meghalaya nen an inkhel leh ang a, chumi hnuah Hyderabad, Haryana, J&K leh Mumbai te an la hmachhawn leh bawk ang.