90+3' Virgil van Dijk - a tawpah a changtupa!

Greece khelmualah Netherlands-in hnehna an chang zo dawn tawh lo emaw an inti a, mahse, thawnthu ngaihnawm ziah a ni ta zawk - Thawhṭanni zan khan Euro 2024 beiseina chhi nung turin Netherlands chuan 1-0 in Greece an hneh.

Inkhela goal lut hi hun pek belh minute thumnaa lut a ni a, penalty aṭangin a ni - a pet goal-tu chu defender Virgil van Dijk a ni a, inkhel boruak sangah Liverpool leh Netherlands captain hian penalty a chhuih lut.

Netherlands-in hnehna an chan avangin Euro 2024 khelh an beiseina chu tihnunin a awm zel a, an hneh tak Greece tan erawh thilmak beisei tel a ṭul ta. Group B aṭang hian France chu Germany pan turin an tling tawh a, hmun ruak pakhat hi Netherlands leh Greece ten an inchuh.

Ronald Koeman enkawl Netherlands hian point 12 neiin pahnihna an ni a, Greece nen an point hmuh zat a inang. Mahse, Netherlands-in match hnih khelh tur an la neih laiin Greece erawh match khat chiah an nei tawh thung.

Greece an khawng

Athens khawpuia inkhelah Greece-in tlarhnung ven an ngai pawimawh a, coach Gus Poyet-a'n 5-3-2 formation rawn hmangin Dutch team dan chah chu a tum ber a ni a, a hlawhtling teuh hle - Netherlands-in chance awmze nei an nei thei meuh lo.

Minute 28-na a ni a, Netherlands-in penalty an hlawh chhuak. Mikhualna ramah goal an khung ngei dawn niin a lang a, mahse, Manchester United striker hlui penalty chhuih hi Greece goalkeeper Odysseas Vlachodimos tan dan nuam tawk vel a ni.

Greece hian left back Kostas Tsimikas chu a duhthala tlan turin zalenna an pe a, hei vang hian tlarhnung hi 4 & 5 in an inthlak fo - Liverpool fullback hian chance ṭha siam tumin ball pawh a vawrh lut fo a, mahse, awmzia a nei thei lo.

Netherlands an hmachhawn hmaa qualifier match sariha goal nga khungtu Giorgos Masouras pawh dah ṭhatin a awm a, Olympiakos winger bakah hian Panathinaikos striker Fotis Ioannidis pawh a che hleithei bik lo - mahse, an duh ber goal venhim hna erawh an thawk ṭha hle.

A tawpah chuan...

Greece tlarhnung an khawng a, chutihrual chuan Netherlands hian chance nei lo tawp erawh an ni lo. AC Milan midfielder Tijani Reijnders chuan vawi thum ngawt chance nei mah se a chhawr thei lo vek a, Greece keeper Vlachodimos a rintlak ṭhin bawk.

Dutch team tan Steven Bergwijn pawhin a theihna neihsanzia pholan duh mah se a hun ṭha neih chu Nottingham Forest keeper Vlachodimos bawkin a dansak a, rawlthar duhawm Xavi Simons chuan a chance neih a chhawr lo bawk.

Mahse, hun pek belhah Netherlands tan vanneihna a her chhuak. Poyet-a'n goal khung tura a luhtir, AZ Alkmaar striker Vangelis Pavlidis chuan Denzel Dumfries a titlu a, Dutch club tana khel Pavlidis hian penalty a chawi!

Weghorst-a penalty hlahnaah Van Dijk-a'n a hlah ve duh lo a, an hun ṭha neih hi goal-ah a chantir - Greece tan tho leh turin hun a awm tawh lo a, Chelsea boss hlui Gus Poyet -a'n a lungawi lohna a lantir nasat deuh avangin hnawhchhuah a ni zui.

Beiseina chu

Group B aṭangin match ruk khelh tawha la chak fai vek France an tling chiang tawh a, group tin aṭanga a sang pahnih an tlin dawn avangin hmun ruak pakhat a la awm - hei hi Netherlands leh Greece ten an inchuh.

Netherlands leh Greece hi an point hmuh zat inang mek mah se head-to-head a chungnung zawk Netherlands hi pahnihna an ni a, match khatin an khel tlem zawk bawk.

Greece tan tling tur chuan Netherlands hi an hmabak match hniha an tlawm a, anmahnin match khelh tur an la neih chhuna France an hneh a ṭul a, a tawi zawnga sawi chuan 'thilmak' a ngai.

Poyet-a team hian France hi lo hneh 'khiah' pawh ni se, Netherlands hmabak match hnih hi Republic of Ireland leh Gibraltar an ni a, Dutch team hian hmabak match aṭanga point an hmuh tawh miah loh chu a rinawm chiah lo.