Sweden vs Belgium: Firfiaka chetnain a hliahkhuh

Euro 2024 qualifier-ah Thawhṭanni zan khan Belgium leh Sweden te an intawng a, first half-ah 1-1 niin, second half-ah erawh an inkhelhna Brussels khawpuia firfiaka chetna avangin khelh chhunzawm a ni lo.

Mikhual team Sweden hian Viktor Gyökeres hmangin goal hmahruai an khung a, mahse, Belgium tan striker chhuanvawr Romelu Lukaku chuan penalty aṭangin si phurh a sut - goal dang lut loin chawlhlawk hman a ni.

Mahse, chawlhlawlk hman a nih lai hian Brussels khawpuiah firfiaka chetna avangin Swedish mi pahnih chu thah an ni, tih thuthar a awm a, ramin thil rapthlak tak a tawn laia inkhelh chhunzawm chu tih chi loah ngaiin khelh chhunzawm a ni ta lo.

Thu rapthlak

Firfiaka chetna hi Sweden leh Belgium inkhelh hmaa thleng a ni a, mahse, team pahnih inkhelh hmain thil thleng hi an la hre hman lo. Sweden boss Janne Andersson chuan, "Chawlhlawk hmang tura dressing room ka pan khan thil thleng ka hre ve chiah a ni.

"A rapthlak lutuk a, awih a harsa zawk. Eng khawvelah nge maw kan chen tak le, ka ti hial a ni. Room ka lut a, thil thleng chungchang chu kan sawi zui a, chhiat tawk te leh an chhungte zahna lantir nan inkhel chhunzawm lo turin thutlukna kan siam ta a ni," a ti.

Swedish broadcaster TV6 chuan Swedish footballer-te chuan UEFA hnenah inkhelh chhunzawm an duh loh thu hi an hrilh niin an sawi a, Belgian national team lam pawh hian an lo remtihsak a ni.

Fan-te himna

Keini lam sanaa zan dar 12:15 inkhel hi, inkhelh chhunzawm a nih loh tur thu tihchian a nih hian keini lam sanaah chuan zing dar 2:00 a ni tawh a, mahse, fan-te chu an sahimna tura an inkhelhna King Baudouin Stadium chhuahsan mai lo tura hriattir an ni.

Zing lam dar 2:00-a inkhelh chhunzawm loh tur chiang tawh kha, zing dar 3:15-ah venhimna nen stadium an chhuahsan thei hlawm chauh a, Sweden fan-te chu Police-ten venhimna an pek an ngai hial a ni.

Hetihlai hian Sweden team-te pawh thlawhtheihna ṭum hmun thlenga venhimna pek an ni a, chhiatna thlenna hmun Boulevard d'Ypres hnai leh a chhehvel kawng zawng zawng chu dan nghal vek a ni bawk.

Swedish mi

Vanduaina tawk mi pahnihte hi Swedish mi an ni a, Euro 2024 qualifier khel tura zin an nih leh nih loh a hriat lo. Mahse, Belgian media-te chuan mi pahnihte hian Sweden national team jersey an hak thu an tarlang.

Swedish FA chuan, "Brussels khawpuia chhiatna avanga tuartu te leh an chhungte kan hre reng a ni," tiin social media lamah vanduaina tawkte an hriat reng thu an tar chhuak.

Belgian national team chuan, "Vanduaina tawktute kan hre reng a ni," an ti a, Belgian prime minister Alexander de Croo chuan, "Brussels khawpuia Swedish khua leh tui te chunga thil thleng hi ka tawrhpui êm êm a ni," a ti ve bawk.

A ngai lo

Belgium leh Sweden awmna group F aṭang hian Belgium leh Austria an tling chiang tawh a, Sweden tan chuan UEFA Nations League ranking kaltlanga qualifier khelh chu beiseina neih theih dan awmchhun a ni tawh.

Hemi a nih avang hian Sweden captain Victor Lindelof chuan, "Belgium an tling chiang tawh a, keinin European Championship kan khel thei tawh lo bawk. Chuvang chuan match hi khelh ṭhat leh kher ngaiah ka ruat lo," a ti a, inkhelh ṭhat a beisei lo.

Brussels khawpuia firfiak taka che hi zawn mek a ni a, he thu buatsaih a nih lai hian man a la ni lo. Social media lamah erawh mi pakhat chuan video post-in, a tih a nih thu a sawi a, Arabic ṭawng hmangin pathian hminga ti a nih thu a sawi a ni.