Australia an chak ve ta

Cricket World Cup 2023-a a vawi khat nan Australia an chak ve ta a, Thawhṭanni khan Sri Lanka chu wicket ngain an hneh - tun World Cup match thum an khelha an vawi khat chakna a ni a, Sri Lanka erawh match thum an khelh tawhah vawi thum an tlawm tawh thung!

BRSABV Ekana Cricket Stadium, Lucknow-a inkhelah hian ṭhumvawrah Sri Lanka an vannei zawk a, vuak hmasak an thlang - duh an thlang sual! Over 43.3-ah an out vek a, run 209 bak an tlin lo.

Sri Lanka hian bul chu an ṭan pangngai viau. A rawn ding chhuak hmasa pahnih, Pathum Nissanka (61 runs) leh Kusal Perera (78) ten ṭha taka bul rawn ṭanin, an hnunga ding turte tan kawng an sialsak a, Sri Lanka fans pawh an hlim hman hle.

Mahse, batter pahnih an out hnuah Sri Lanka hian ngai an awh leh tawh lo! Charith Asalanka-a'n run 25 a rawn siam ve leh tih loh chu SL player zingah run 10 vaw tling an awm tawh lo a, over 43.3 lekah an out fai vek!

Australia tan spin bowler Adam Zampa a che ṭha a, kum 31 mi hian over riat a vawmah run 47 chiah pein wicket li a la a, Sri Lanka batter-ten IPL club Rajasthan Royals bowler hi an ngam lo.

Match hnih an khelh tawha chak la nei lo Australia-in an tan chakna chance a sang tih an hria a, mahse, a tir lama batter lut zingah David Warner (11) leh Steven Smith (0) te an che ropui lo hle - chutihrual chuan opener Mitchell Marsh chuan run 52 siamin an beiseina a chhit nunsak.

Marnus Labuschagne pawhin an tan chak a hun ve tawh tih pholangin run 40 a rawn siam a, Josh Inglis (58) pawhin a team tan a rawn thawhhlawk viau - batter pahnih 'out' hnuah pawh Glenn Maxwell (31) leh Marcus Stoinis (20) ten mawhphurhna la ve lehin a tawp thlenga damin, an team an chakpui a, over 35.2-ah run 215 siama target um phakin wicket nga chiah an hloh a ni.

Australia-in hnehna an chan tak avangin semifinal beiseina thi ṭep tawh chu a nung ve leh ta, tiin a sawi theih a, hetihlai hian match thuma vawi thum chak lo tawh Sri Lanka tan erawh beiseina nei turin thilmak a thlen tel tawh a ngai ang.