Mourinho hma hun a chiang lo

Jose Mourinho-a'n a club enkawl lai AS Roma bak club dang ngaihtuah a neih lo thu a sawi fo a, mahse khawthlang chanchinbu mite chuan 2023-24 season zawh rualin Italian club hi a chhuahsan dawn niin an sawi.

Nipui bazar lai khan Mourinho hian Saudi Arabian club aṭangin khawvela coach hlawh hnem ber ni tura sawmna a dawng a, mahse a hnawl. Roma a enkawl chhunzawm ta zawk a, amaherawhchu beisei angin an che ṭha rih lo.

Chelsea, Manchester United leh Tottenham Hotspur te enkawl tawhtu hian Houssem Aouar, Romelu Lukaku, Sardar Azmoun, Evan Ndicka, Rasmus Kristensen, Renato Sanches leh Leandro Paredes te a nei thar a, insiamrem nan hun a hmamawh hret niin a lang.

Tun season tir lam inelna hrang hrang an match hmasa 10 aṭangin vawi nga chiah an chak a, Serie A bikah phei chuan a hmasa pathumah an tlawm - tun hnaiah insiamṭha hretin table-ah pawh 10-na an ni phak leh tawh.

Portuguse manager hian champion dan a thiam a, a kawng pawh a hria. Mahse, hlawhtlinna chang tur chuan hna hautak a paltlang hmasak a ngai ṭhin. Saudi club aṭangin sawmna duhawm a dawng reng a, chona a hmachhawn lai a paltlang ang nge nia a chhuahsan dawn tih hriatthiam a harsa rih ta hle.