Ka chawl hman ṭep a ni - Evans

Jonny Evans chuan hliam vangin a football zinkawng a buai ve hle tih a sawi a, a club hlui Manchester United lama a kir leh hmain inkhelh chawlhsan mai pawh a rilruk hman tih a sawi.

Kum 35 mi Evans hian Leicester City tana a contract neih lai a hmang zo a, a kum a tam tawhin khelhna tur club ṭha hmuh chu thil huphurhawm tak a ni tawh ngei ang, heitihlai hian a club hlui Man United chuan an hnena khel turin an lo la mamawh.

Evans chuan, "Season hmasa khan ka tan hun harsa zinga hrehawm zual a ni, a nihna takah chuan chawn hliam vangin ka chawl rei êm êm a, match 14 chauh ka khel ve thei a ni.

"Inkhelh chawlhsan kha ka rilruah a lian hman hle a, hliam vang khan ka duh aia hmain ka chawl ngei dawn a nih hi tih kha ka ngaihtuah hman. Mahse, tunah chuan beiseina thar nen football khawvel ka thlir ve leh thei ta," a ti.

Manchester United-in Premier League an khelh hnuhnung pathum zinga pahnihah Evans hi a inlan. Lisandro Martinez a hliam mek a, hliam vangin Raphael Varane a chawl zauh zauh bawk - tlarhnung laia chhawr turin Evans hi a lo awm leh chiah a ni.