Thawhchhuah leh ngei ka tum - Saina Nehwal

India nula badminton khel thiam Saina Nehwal chuan inkhelh chawlhsan mai a la tum lo. Tuna a thil tum lian ber chu Paris Olympic khelh hunah a ṭha thei ang bera inlan a nih thu a sawi chhuak.

Saina hi hliam leh harsatna vangin tun hnaiah a inkhel tam lo, tournament a hmachhawn hoah pawh result a nei ṭha ngai vak lo. Kumin June thla khan Singapore Open-ah a inlan a, a hnu lamah chuan inelna a la hmachhawn leh miah lo a ni.

London Olympic bronze medalist Saina chuan, "Training chu ka nei reng a, mahse rim leh nasa lehzual zawka ka chet dawn hian ka khup hi a la na deuh ṭhin, chu chu tun dinhmuna ka harsatna lian ber a ni.

"Kan elpui leh khawvel huapa ṭha An Seyoung leh Tai Tzu Ying te chet dan hi thlir ila, training an nei ṭha hle. Anni elphak tur chuan ni khatah darkar 6-7 vel ṭha taka training kan neih ve a ngai, chutiang a nih loh chuan kan inhmachhawn hunah thil a harsa ṭhin.

"Mi ṭhenkhat chuan badminton khelh chawlhsan tawh mai tura thurawn min pe pawh an awm, mahse kei chuan chawlh mai ka la tum lo - chawl tura thutlukna siam chu harsa ka la ti takzet.

"Badminton hi kum 20 chhung ka khel tawh a, chuvangin ka ngainain ka hmangaih hle. Paris Olympic 2024 khelh phak hi tuna ka hmachhawn lian tak a ni a, ka khel thei a nih phawt chuan India tana medal lak ngei tumin ka bei bawk ang," tiin a sawi.

Tun dinhmunah Saina hi world number 55 a ni a, nakkuma neih tur Paris Olympic khel tur chuan qualifying a khelh ṭhat a ngai dawn hle. Tun season tawp hma ngeia inelna a hmachhawn hman lo a nih chuan kawng a harsa hle ang.

Season kal laiah India badminton player ṭhate an che ṭha tawk lo. Mipa player langsar HS Prannoy chu Denmark Open leh French Open aṭangin a inhnukdawk, hnungzâng na vangin a inkhel thei rih lo a ni.