Champion ngamtu Atletico tan fiahna

Atletico Madrid-in Champions League quarterfinal lut turin champion lai leh rinkai zawk Liverpool an hneh a, zanin dar 12:30-ah semifinal luh inchuhin RB Leipzig an hmachhawn dawn. 

Diego Simeone-a enkawl team hian Lisbon, Portugal an pan hmain chanchin lawmawm lo tak an nei a, first team player pawimawh pahnih Angel Correa leh Sime Vrsaljko-ten Inrinni khan Covid-19 an kai tih hmuhchhuah a ni. 

Covid-19 vangin an ruahman angin Atletico an awm thei lo a, Pathianni khan a vawi hnih nan Portugal-a an zin hmain player leh coaching staff-ten test an nei nawn. Atletico tan thlenna hmun, training dan tur, zinchhuah dan thlengin engkim tih danglam a ngaih phah a, hei hian an rilru lamah nghawng thui tak a nei ang tih a chiang. 'Team huaisen' tia sawi ṭhin he team hi an paukhauh tak tak leh tak tak loh chu zaninah a hriat dawn e. 

Leipzig inkhel en ṭhin chuan 'vertical attacking football' an khel ṭhin tih an hria ang a, a tawi zawnga hrilhfiah dawn chuan Premier League-a Liverpool khelh dan leh Julian Nagelsmann-a naute khelh dan a inang. 

Jurgen Klopp-a'n Chelsea pan ta Timo Werner-a duh chhan langsar tak pakhat chu a khelh dan system ang hnuaia bel tawh sa a nih vang niin a lang a, German club hian ball an hloh ruala 'press' chu an tih dan a ni a, ball neih let tumin an chuh vat ṭhin. 

Nagelsmann hian 3-4-1-2 formation emaw 3-4-2-1 a rawn hmang lehin a rinawm a, midfield laiah player pahnih dahin hei hi an attack zawh ruala Atletico Madrid-in an chhu let tur danna tur a ni ang. 

Werner-a awm lai khan goal khungtu ber a ni a, a bulah striker pasang Yussuf Poulsen awmin Danish striker hi Leipzig-a Werner vul theih chhan a ni - a tawi zawnga sawi chuan Sadio Mane leh Mohamed Salah vul nana Liverpool-a Roberto Firmino hnathawh ang hi a hnathawh chu a ni. 

RB Leipzig hian Champions League quarterfinal lut turin last 16 inkhel pahnih belhkhawmah Tottenham Hotspur chu 4-0 in an hneh a, Spurs striker ṭha pahnih Harry Kane leh Son Heung-min inhliam lai a  ni thung. 

Hriat tel tur erawh Leipzig hian hetihlai hian Timo Werner an nei a, tunah erawh an nei tawh lo. German club-in an striker ṭha hi chan mah se Roma aṭanga loan hmanga an hawh Patrik Schick hi rin tlak a ni a, Bundesliga match 22-a khelhah goal 10 khungin assist vawi hnih a nei thei. 

Schick thlawptu tura beisei striker pasang Poulsen hi ke rek hliam vangin a dinhmun a chiang lo a, a khelh erawh chuan Atletico tlarhnung tan buaipui tham a ni ang. Midfield-a number 7 hatu  Marcel Sabitzer hi chhinchhiah tur a ni bawk - tun season inelna hrang hrangah match 42 khelin goal 16 a khung tawh a, assist vawi 10-a nei bawk.

Number 10 hatu  Emil Forsberg hian bul a ṭan rinawm chiah lo mah se match 31-a goal 10 leh assist pali nei thei a ni a, mangan huna danglamna thlen turin a ṭha tawk - Attacking midfielder Christopher Nkunku hian match 42-ah goal nga khungin assist vawi 16-a nei tawh tih hriat tel a ṭha. 

European top coach zingah Diego Simeone tluka defensive game thiam hi an tam kher lo ang - Liverpool lakah bet thlap chungin counter attack-ah an innghat a, goal khung tam zawk an ni thei. Lisbon zin dawn a ruaiah Angel Correa leh Sime Vrsaljko ten Covid-19 an kai avangin Simeone-a'n chawpchilh takin ruahmanna a thlak a ngai dawn tih a chiang reng a, a squad a chhah tawk avangin buaina tur erawh awmin a lang lo. 

Argentine coach hian a hman ṭhan ang bawkin 4-4-2 chu a rawn thawhchhuahpui leh a rinawm a, Álvaro Morata-a'n match 43-ah goal 16 khungin assist vawi li nei mah se striker rorum Diego Costa leh Joao Felix inkawp chu Leipzig attacking vuak let nan a duh zawk a rinawm. 

Costa hian tun season inelna hrang hrangah match 29 khelin goal nga leh assist vawi nga chauh la nei mah se inkhel boruak sangah chuan Simeone-a'n a la thlang chatin a rinawm a, match 35-a goal riat leh assist vawi thum neitu Felix pawhin a theihna pholan a hun khawp ang. 

August thlatir lam khan Spanish media ṭhenkhat chuan Diego Simeone-a'n RB Leipzig laka a starting XI tur a thlang fel diam tawh niin an sawi a, dam lo tharlam nei mah se ruahmanna ṭha sa nei a nih avangin Simeone tan hna a harsat phah lo ang. 

Jan Oblak chu hnial rual lohin si ban nghak tur a ni leh dawn a, Spanish chanchinbu lar Diario AS-in a tarlan dan chuan right back-ah Kieran Trippier aia  Santiago Arias lutin Stefan Savic, Jose Gimenez leh Renan Lodi nen an inkawp dawn. 

Midfield laiah hliam vangin Thomas Partey-a'n bul a ṭan hmel loh a, Koke leh Saul Niguez chu midfield laiah awmin Correa  leh Yannick Carrasco chu mual sir aṭanga nawr tur an ni a, tlarhmaah midfielder Marcos Llorente leh Costa 'risk' a tum. 

Mahse, AS-in he chanchin a ziah lai hi August 1 a ni tawh - Correa a dam loh tak avangin captain Koke hi a nuam tih berna mual sirah pawt letin a laiah Llorente a awm ang a, Felix-a'n hmun a chan phah thei ang. 

Kum 50 mi Simeone-a rorumzia hmuh turin a awm fo a, mual sirah a naute a fuih phur piahlamah match official te an inhnialpui fo a, hemi hrechiangtu, coach thisen lum ve tak Julian Nagelsmann chuan Simeone-a hmaah insum hram hram a tum thu a sawi!

Kum 33 mi coach chuan, "Game lamah rilru sen hram hram ka tum ang a, buaina a chhuah loh nan ka insum ang," a ti! Nagelsmann chuan sawi zawmin, "Inkhel en tu an awm dawn loh avangin thusawi a hriat lehzual theih dawn a, thil tam tak sawiin referee pawh a chhaih buai leh ngei ang," a ti a, insum a tum hle. 

Leipzig defender Marcel Halstenberg chuan, "Rilru zawng zawng pea inkhel thlir ṭhintu an ni a, mual sira an ding dun tur hi en a châkawm," tiin a sawi - mahse, Nagelsmann-a'n insum a tum thu a sawi a, a insum zawh leh zawh loh kan hre thuai dawn. 

Kum 28 mi lek a nih laia Hoffenheim coach ni tura ruat Nagelsmann chuan a khingpui coach chu fak zuiin, "Coach 

ṭha bik a ni a, 4-4-2 formation a hmang reng chungin hei leh chen hi top zingah a awm tawh. Hlawhtlin a duh reng a, chu chu midang aia a danglamna a ni," a ti a, a dah sang hle.