Arsenal beiseina tinungtu Welbeck

Danny Welbeck chu hliam vanga thla sawm chhung zet a inkelh theih loh hnuah a lo kir leh ta. Pathianni zan khan khelmualah minute sarih chhung hun a hmang a, goal pawimawh bik khungin Arsenal chuan an mikhual Leicester City 2-1 in an hneh.

Premier League champion tum inum boruak a lian chho mek zel a, Tottenham chuan khualmualah Manchester City 2-1 thoin an hneh ve bawk. League match 26 khelh zawh a nih hnuah team paliin nomawi chawi beiseina an la nei lian zel.

A tawpah laipui a puak

Emirates Stadium-a inkhelah Arsenal-in inkhel bul ṭan ṭha zawk mah se Leicester tlarhnung Robert Huth leh Wes Morgan bakah keeper Kasper Schmeichel an sutlang thei lo.

Premier league top scorer nilai Jamie Vardy chuan minute 45-naah penalty aṭangin goal a khung. English striker hian tun season-ah leag-ue goal 19 a khungna chiah a ni.

Second half ṭan tirah Danny Simpson chu yellow card vawi hnih hmuh vangin hnawhchhuah a ni a, player 10 a khel Leicester lamin goal khung belh aiin goal venhim an ngaipawimawh tawh a, tlarhnungah an inhnawhkhawm.

Arsene Wenger-a'n point hloh a hun tawh lo zia a hai lo a, English duo Theo Walcott leh Welbeck a rawn dah lut.

Francis Coquelin thlaktu Wal-cott hian minute 70-naah an si phurh a sut a, hun pek belh tawp rualin Welbeck chuan chakna goal a khung bawk. Gunners-in point thum hlu bik an hlawh chhuah bakah an elpui Leicester point thum an chhuhsakah a ngaih theih.

Chak lo mah se Leicester hi league table-ah hmahruaitu an la ni reng a, point 53 hmuin an hnuaiah hian point 51 hmu Tottenham leh Arsenal an awm mek.

Manager thukhawchang

Inkhel chungchang sawiin Wenger chuan, "Leicester kha hneh lo ni ta ila kan inthlauhna chu point riat a ni tawh dawn. Si khat kan phurh bawk avang khan kan hna a hautak zual hle bawk. Mahse, minute 36 chhung kha player 10-in an khelh a ngai a, kan beidawn duh loh rah chu a tawpah kan hmu," a ti.

Wenger chuan chakna goal khungtu Welbeck fakin,"Karleh lama inkhel turin ka beisei chauh a, mahse tun hnai ni hnih chhungin training naah a chet ṭhat em avangin squad-ah ka telh. Kei chauh ka ni lo a, club a mi zawng zawng hian a lo kir lehna inkhela goal a khung hi kan lawmpui," tiin a sawi.

Leicester boss Claudio Ranieri chuan, "Arsenal ball inpe kual vel kha a rangin an skill a sang em em a, inkhel ropui tak a ni. Player 11-a khel tluan chu ni ila result a danglam theih ka beisei. Table hmahruaitu kan la nih avangin lungngaih lutuk tur a ni lo a, kan khel chhe hran lo bawk," tiin a sawi.

Hmabak

Arsenal hian Inrinni hian FA Cup fitth round-ah Hull an mikhual dawn a, karleh khian Champions League last 16-ah champion lai Barcelona nen an inhmachhawn bawk ang.

Leicester erawh FA Cup a-
-ṭanga an tlak tawh avangin an hahchawl thei dawn a, February 27 khian King Power Stadium-ah Norwich nen league match an khel leh chauh dawn a ni.

Spurs an tlo

Season ṭan niah Manchester United hneh lo nghal mah se Tottenham-in beisei phak bakin an khel ṭha chho a, Etihad Stadium-ah Manchester City 2-1 a hnehin league hmahruaitu Leicester chu point hnih chiahin an phak lo mek.

Spurs tan hian striker Harry Kane chuan minute 53-naah penal-ty aṭangin goal hmahruai a khung a, City tan substitute Kelechi Iheanacho chuan minute 74-naah sut mah se hun tawp dawna Christian Eriksen goal khung hmangin Spurs in hnehna an chang.

England international Kane hian league match a khelh hnu-hnung 17 aṭangin goal 15 a khung leh tawh. Mauricio Pochettino naute hi a zawnin match 12 chhung khualmualah an tlawm tawh lo a ni.

Season tawp ruala Man City chhuhsan tur Manuel Pellegrini hian tun season-ah a naute hi an khelmualah vawi li a chak loh pui tawh a, a season hmasa pahniha vawi thum an tlawm aiin a tam tawh zawk a ni.

Man City tan league nomawi beiseina a la bo bik lo a, tun din--hmunah point 47 hmuin palina dinhmun an luah mek a, hmahruaitu Leicester chu point rukin an phak lo mek.

Eng nge an sawi?

Man City boss Pellegrini chuan, "Referee Mark Clattenburg-a'n penalty hmanga min hrem kha chu thutlukna dik lo tak a ni. Kha khan inkhel a her danglam vek a, theihtawp chhuah mah ila point thum hlawhchhuah nan a tawk zo lo," tiin penalty an chawi chu a lungawi loh thu a sawi.

Tottenham boss Pochettino chuan, "Inkhel pawimawh tak a ni a, ka naute rilru put hmang dik vangin kan dingchang. Penalty kha chu kan chungah pawh thleng thei a ni a, kan khingpuite chunga a thlen chang pawh a awm, hei hi football kalphung a ni miau a," a ti.

Ngaihnawm

• Leicester hian kum 1994 November thla hnuah Arsenal hi Premier League-ah an la hneh leh lo. (P19 W0 D6 L13)

• Vardy hian tun season-ah penalty aṭangin goal ruk a khung tawh a, ani aia khung tam an awm lo.

• Minute 70-naa Walcott-a goal khung kha Gunners-in goal zawna an pet vawi khatna a ni a, Welbeck goal kha goal zawna an vawi ruk petna chiah a ni bawk.

• Leicester hian league-ah a zawnin starting XI an thlak tawh lo a, tun season-ah anni aia a ngai hmang rei an awm lo. Premier League chanchinah kum 2015 May thla khan Arsenal hian hetiang chiah hian an lo ti tawh bawk.

• Welbeck-a goal kha munite 90 hnulama Arsenal-in Premier League-a goal 100 an khung tlinna chiah a ni bawk.