Goan club-in hnehna an chang

Sporting Clube de Goa chuan tun season-a an khelmuala an chak hmel hmasa ber an hmu a, Pathianni zan khan Odafa Okolie goal hnih khung chhawr ṭangkaiin Mumbai FC chu 3-2 in an hneh.

Goan club dang Salgaocar FC chuan an chak hmel hmasa ber an hmu bawk a, Santosh Kashyap-a naute hian khualmualah DSK-Shivajians chu 3-2 in an hneh. Goan club tan Scottish striker Darryl Duffy chuan hat-trick a siam.

Mumbai FC an tlawm

Fatorda Stadium, Goa-a in-khel-ah hian Mumbai FC tan Sushil Singh chuan minute 17-na lekah goal hmahruai a khung a, mikhual team lawm chhung erawh a rei lo.

Minute sarih a liam hman chauh tihin Nicholas Fernandes-a'n Sporting Goa tan a sut. Churchill Brothers aṭanga loan-a Sporting zawmtu hi second 16-na leka Aizawl FC lama goal khungtu kha a ni.

Manipuri striker Sushil Singh-a'n minute 57-naah Mum-bai hmahruai nawn pui leh mah se Goan club-in penalty vawi hnih an hlawh chhuak a, Nigerian striker Odafa-a'n goal-ah a chantir ve ve.

Mumbai FC tan Sushil Singh-a'n hat-trick siamna hun ṭha nei mah se Arata Izumi ball siamsak ṭha tak chu engmah loah a chantir a, khualmualah Mumbai 3-2 in an tlawm.

Hmabak

India international midfielder ni ṭhin Khalid Jamil-a enkawl Mumbai FC hian February 20 khian Rajiv Gandhi Stadium, Mualpuiah Aizawl FC an hma-chhawn leh ang.

Duffy-a show

Shiv Chhatrapati Stadium, Pune-a inkhelah DSK-Shiva-jians-in player chelh loh pakhat an nei a, chu chu Scottish striker Darryl Duffy a ni.

Swansea City striker hlui hian minute 39, 46' leh 70-naah te Goan club tan goal a khung a, Pune khawpuiah awlsam takin Salgaocar an chak dawn niin a lang hman.

Mahse, Duffy-a'n hat-trick a siam hnuah DSK an harh thar a, Pune club hian minute 76 leh 86-naah Aser Dipanda hmangin goal hnih an khung. Maharashtra club harh chhuah a tlai a, hun tawp thlenga goal dang an khung theih tawh loh avangin 3-2 in an tlawm.

DSK tan an player lak thar Real Madrid youth system chhuak Juan Quero Barraso-a'n inkhel bul a ṭan a, inkhel danglamna erawh a thlen thei lo. Pune club tan hian North Mualcheng tlangval Lalhmangaihsanga Ralte chuan inkhel bul a ṭan bawk.