NBA All-Star Game Bryant thlahnaah Westbrook a langsar

Thawhṭanni zing khan Toronto, Canada-ah NBA All-Star Game khelh a ni a, Western Conference-in Eastern Conference chu 196-173 in an hneh. Oklahoma City Thunder point guard Russell West-brook chu kum zawnin Most Valuable Player a thlan a ni.

Season tawp ruala bas-k-et-ball khelh chawlhsan tawh tur Los Angeles guard Kobe Bryant-a'n kumin All-Star Game khel turin vote a hmu tam ber a, khel ṭha lo mah se basketball legend Bryant-a'n court a rap hrim hrim hi basketball ngainatute tan lawmna tham a tling.

Bryant hian point 10 chauh a neih avangin All-Star Game-a a score zat point 290 chu LeBron James-a'n a rawn khum. Cleveland Cavaliers forward James hian point 13 khungin All Star Game-ah point 291 a khungna chiah a ni a, record a ni.

Kum 37-a upa Bryant chuan, "Nuam ka ti takzet. Ṭhangthar ṭha tak takte nena bench vela fiamthu thawha han nuih ho kha a nuam a ni," tiin a hun hnuhnung chu hlimawm a tih thu a sawi. Los Angeles star hian assist vawi sarih leh rebound vawi ruk a nei a, Bryant chungchang sawiin Miami Heat guard Dwyane Wade chuan, "Naupangte kan nih lai aṭangin Byrant khel lai hi kan en nasa a, tupawhin amah ang nih châk lai hi kan nei vek ang. Chuvangin a hun tawpa zahna lantir hi kan duh a ni," tiin a sawi.

Westbrook ve thung

Oklahoma City Thunder point guard Russell Westbrook hi nikum khan MVP-ah thlan a ni tawh a, tun ṭum hi starting five-a a tel vawi khatna a ni. Westbrook hian Western Conference tan point 31 zet a score a, minute 22 chhungin rebounds pariat, assist panga leh steals panga a nei bawk.

Inkhela point score hnem ber erawh Paul George a ni a, Indiana Pacers forward hian point 41 zet a score a, All-Star record Wilt Chamberlain-a siam point 42 a tluk lohna chu point khat chauh a ni. Kumin All Star hi point tam ber ṭum a ni a, team pahnih point score belhkhawm hi point 369 zet a ni a, nikum aiin point 48 in an tam zawk.