Penalty dangdai khungtu Barcelona an chak

Pathianni zan league match-ah Lionel Messi leh Luis Sua-rez te'n penalty aṭangin goal danglam bik an khung a, an khelmualah Celta Vigo chu 6-1 a sawpin La Liga-ah an ropui chhunzawm zel.

Barca hian Celta Vigo hi season hmasa khan Nou Camp-ah 1-0 in an hneh lo tawh a, September khan 4-1 in an mualpho bawk.

Pathianni zana Celta Vigo an hmachhawn hmaa inelna hrang hranga match 29 chhung hneh loh tawng lo Barca-in zah-ngaihna an lantir nawn tawh lo.

Barcelona tan Lionel Messi chuan goal hmahruai a khung a, Celta Vigo tan striker John Guidetti-a'n penalty aṭangin a sut.

Mahse, Barcelona-in an thiam an pholang chhunzawm a, Luis Suarez-a'n hat-trick a siam bakah Ivan Rakitic leh Neymar-te'n goal khat dang ve ve khungin mualneitu team hi 6-1 in an chak.

Penalty chu

Barcelona-in 3-1 a hma an hruai hnuah penalty an hlawh chhuak a, a pet turin Lio-nel Messi a lo pen chhuak. Ar-gen-tina captain hian goal-ah pet loin ding lamah a thai phei a, area chhunga rawn tlan lut Luis Suarez-a'n a pet goal chiang hle.

Kum 1982 khan Barca legend Johan Cruyff chuan Ajax tan a khelh laiin Jesper Olsen nen Messi-te penalty pet ang hian an lo pet tawh a, kum 2005 khan Ar--senal player Robert Pires leh Thierry Henry-te'n lo ti ve tawh bawkin anni erawh an hlawhtling lo.

Barcelona manager Luis Enrique chuan, "Cruyff-a penal-ty goal kha kan la hriatreng vang a ni ngei ang. Kei chuan khatiang khan ka pet ngamin ka ring lo," tiin Messi-a chet dan chu player inringtawk lo tan chuan tih chi a nih loh thu a sawi.

Player a nih laia Real Madrid leh Barcelona tana lo khel tawh Enrique chuan ,"Mi ṭhenkhat chuan penalty kha mawi tiin an sawi ang a, a ṭhenin an sawisel ang. Mahse, Barcelona player leh club member niha nomawi chawi thei dinhmuna din bawk chuan danglam taka football khelh hi a nuam a ni," a ti.

Neymar aiah Suarez

Inkhelh zawhah Messi leh Suarez penalty-in sawi a hlawh a, mahse Messi khan Suarez niloin Neymar pek a tum zawk nia tarlan a ni.

Brazil captain chuan he thu---thang hi a dik tih sawiin, "Khatianga penalty pet goal kha kan zir ṭhin a, ka pet goal turin Messi khan a rawn pet phei a ni. Mahse, Luis khan kei aia a thlen hma zawk avangin a pet a, a pet goal a ni," a ti.

Neymar chuan sawi chhun-zawmin, "Ṭhian ṭha tak vek niin kan inkawmngeih em em vek a, tunge goal khung? tih ai chuan chu chu a pawimawh ber zawk chu a ni," tiin inṭhian ṭhatna a ngaihpawimawh ber thu a sawi.

Hmasial lo Messi

Messi khan penalty kha a dan pangngaiin pet se chuan Bar-celona tan La Liga-a goal 300 a khungna tur chiah a ni a, mahse a ṭhiante tan a siamsak thung.

Hetihlai hian Spanish referee lar tak Eduardo Iturralde chuan Messi-a penalty chu statistic
aṭanga teh chuan Messi-a penalty pet goal loh zinga chhiar theih a nih thu a sawi a, Guardian football writer Sid Lowe chuan Iturralde thusawi hi twitter-ah a ziak bawk.

Football statistic lam buai-pui ṭhin Opta chuan, "Messi kha penalty pet goal lo anga record a ni a, assist anga record a ni thung," tiin Messi penalty chungchang an tarlang.

MSN bawk!

Barcelona tan tun season-ah Luis Suarez-a'n inelna hrang hrangah match match 35 khelin goal 39 a khung tawh a, league match-ah bik vawi 22 inlanin goal 23 a khung tawh a, La Liga top scorer a ni mek.

Liverpool striker hlui hnuai chiahah hian league match 24 a inlana goal 21 khungtu Cris-tiano Ronaldo a awm.

Lionel Messi-a'n tun sea-son-a league match 18 a khelh aṭangin goal 13 a khung tawh a, inelna hrang hrangah vawi 29 inlan tawhin goal 25 a khung tawh.

Brazil captain Ney-mar a nep bik lo. Inelna hrang hrangah vawi 30 inlan tawhin goal 22 a khung a, league match bikah vawi 20 a inlanah goal 17 a khung tawh bawk.

Atletico tan Torres

Fernando Torres-a'n a match hnuhnung pahniha a goal hnihna a khung a, Pathianni zan khan Getafe lakah Atletico Madrid chu 1-0 in hnehna a chanpui.

Spanish striker hian tun season-ah league match 18 khel tawhin goal li a khungna chiah a ni a, tun hnaiah hmana a thiamna ang kha a la theihnghilh lo tih khelmualah a lantir fo.