Chhinga Veng FC-in MPL khel dawn

16th February, 2016

Aizawl DFA First Division champion Chhinga Vengin history thar ziakin Mizoram Premier League Season 5 khel turin an inpet tling.

MPL Playoff-ah District FA club-in MPL club an la hneh ngai lo a, Chhinga Veng hian Mizoram chhunga football league sang ber khel turin MPL4 pasarihna Luangmual FC an hneh.

Nimin tlaia khelh Playoff secong leg-ah Chhinga Veng leh Luangmual FC ten goal khat ve ve khung mah se first leg-ah Chhinga Veng 1-0 a an chak tawh avangin belhkhawmin Chhinga Veng 2-1 in an chak.

MPL5-ah team thar pahnih - Ramhlun North FC leh Chhinga Veng FC-te hmel kan hmu dawn ta a ni.

Intluktawk

Chhinga Veng FC-in MPL khel turin point khat chauh an mamawh a, chutichung chuan huaisen takin attacking football an khel a, Luangmual FC nen goal khung an tum ve ve.

MPL5 Qualifier-a vanduai Chhinga Veng chance hmasa ber chu rawlthar striker Jakob Vanlalhlimpuia'n goal-ah a chantir thei lo. Bul ṭan ṭha Chhinga Veng khel a zuih chho a, Luangmual FC khelah hmasawnna hmuh tur a awm thung.

Minute 24-naa Puitea ball pet chu penalty area-ah Ronald Lalzikpuia kutah a fuh a, Luangmual defender Rosangliana'n penalty aṭangin a khung.

First half-ah MPL pasarihna Luangmualin chance ṭha an ngah zawk a, attacking trio B. Malsawmzuala, Lalṭhazuala (Puitea) leh F. Lalmuansanga (Puitea Fanai) te'n goal khung theih ngeina tur chance an hlah vek.

Second half-ah Chhinga Vengin counter attack hmangin an nawr let a, Khawzawl winger tlan chak Vanlallawma'n a khung. Minute 53-naa goal khungtu Lawma hi first leg-a Chhinga Veng tana goal khungtu tho kha a ni.

Team pahnih an inhnehtawk a, hun tawp dawn hnaihah Chhinga Veng tlangval Isaac Lalremruata'n a chance ṭha neih a khung loh avangin hun tawp thlengin an buai phah. Injury time-ah Chhinga Veng player Lalrinhlua Ralte chu hnawhchhuah a ni a, Luangmual FC-in an tam zawkna hmang ṭangkai turin hun an nei tam lo a, an chance neih Lalrinsanga'n a khung thei loh avangin MPL khel turin Chhinga Veng an tling.

MPL Kalkawng

Chhinga Veng FC hi kum 1985 khan din a ni tawh a, amaherawchu hun rei tak a nun tawh loh hnuah kum 2012 khan Chhinga Veng Sporting Club angin kaihthawh leh a ni.

Kum 2012 hian third division-ah an inziak lut a, zone inelna leh inter zone-ah champion nghalin second division an kai. Kum 2013 leh 2014-ah ADFA hnuaia second division inelna an khelh hnuin first division-ah an tling.

Kum 2015-ah Aizawl DFA First Division League hmasa ber khelh a ni a, Chhinga Vengin bul ṭan ṭha lo mah se season tawpah league standing-ah pahnihna an ni a, final-ah league stage-a hneh loh tawng lo Aizawl FC Academy hnehin an champion.

Qualfier-ah Chhinga Veng hian Kolasib club Project Veng FC leh Cham-phai United an hneha, tling ngei tura ngaih an ni. Amaherawhchu Chhinga Vengin qualfier-a an match hnuhnung berah Ramhlun North an hneh lo a, head to head en a nih avangin Playoff an khelh a ṭul phah.

Playoff-ah MPL pasarihna an la chak vek avangin Chhinga Veng rinkai ni tawh lo mah se a hunah tak tho chhuakin history siam chungin MPL khel turin an inpet tling. Aizawl DFA club-in MPL club an hneh theihna chhan hi ADFA first division league mumal tak an buatsaih vangah a ngaih theih.

Eng nge an sawi?

Chhinga Veng FC manager Lalthanzama Van-chhawng chuan, "Pathianin history leh record siama MPL khel turin min duhah kan ngai. ADFA league hmasa berah kan champion a, Ramhlun North kan hneh loh vangin kan rilru na viau mah se record kan siam theihna kawng zawk a ni. Kan thlen theihna chhan chu kan coach H. Lalremruata inpekna bakah min sponsor-tu Pran leh JSJ Fitpro te an ni a, an chungah kan lawm hle. MPL kan kai theih chhan hi Pathian vang a ni a, result ṭha nei turin theihtawp kan chhuah zel ang," tiin Vanglaini palai a hrilh.

Chhinga Veng FC hi kum 2012-a kaihthawh a nih aṭanga MPL an kai thlengin an veng chhung mi Lalremruata leh Lalthan-zama Vanchhawng-te hian an la enkawl char char. He club hian fans an nei ṭha a, MPL-ah pawh fans nei ṭha ber pawl ni tura ngaih an ni.

Luangmual FC manager Anggu VL Hnamte chuan, "Kan rin ang ngeiin second leg-ah hma kan sawn a, amaherawhchu kan vannei zo ta lo. Hun tawp lama referee thutlukna hriatthiam a har a, chutihrualin MPL khel tur Chhinga Veng kan lawmpui e. MPL khel dawn lo mah ila first division-ah tawnhriat tam zawk nei turin club hi kan kalpui zel ang," tiin a sawi.

MPL season tawp hnuah Luangmual FC hi Ramhlun South-in an lei a, Aizawl DFA hnuaiah an awm zui tawh dawn a ni.

MPL5 Playoff

1st Leg : Luangmual 1-0 Chhinga Veng

CVFC : Vanlallawma 83'

2nd Leg : Chhinga Veng 1-1 Luangmual

CVFC : Vanlallawma 53'

LFC : Rosangliana 24'