Twenty20 series-ah India chak

March 8 aṭangin 2016 ICC World Twenty20 khelh ṭan a ni dawn a, World Cup atan India inbuatsaihna a ṭha hle.

Twenty20 series-a Australia an sawp hnuah India chuan Sri Lanka hnehin series an la leh ta a, India rama khelh tur World Cup atan an beiseina a sang zual sawt ang.

India hian Pathianni zan khan Sri Lanka chu series match thumna an khelhpui a, wicket kuaa hnehna changin match thum khelhna series-ah hian 2-1 in hnehna an chang a ni.

Series match hmasa berah India hian Sri Lanka hi wicket ngaa hneh loin an mualpho tawh a, match hnihnaah erawh India-in run 69-a hnehna changin 1-1 in an inhnehtawk.

Match thumnaah India tan bowler Ravichandran Ashwin a inlar a, Chennai spinner hian over li a vawmah run riat chiah pe chhuakin wicket li a la a, Sri Lanka batsman-te'n an chelh ngang lo. Sri Lanka hian over 18-ah run 82 vaw chhuakin an vaiin an out vek. 

India tan batsman Shikhar Dhawan chuan ball 46-ah run 46 a vaw chhuak a, Ajinkya Rahane chuan ball 24-a hmachhawnah run 22 vaw chhuak bawkin a tawp thleng an dam ve ve. India hian over 13.5-ah run 84 vaw chhuakin mi pakhat chiah an hloh a, awlsam takin an chak a ni.