PSG khelmualah Chelsea leng lut dawn

Zanin dar 1:15 hian Cham-pions League last 16 khelh ṭan a ni dawn a, Premier League champion Chelsea chu French Ligue 1 champion Paris Saint-Germain khelmual Parc des Princes-ah an leng lut dawn.

Jose Mourinho an ban hnuah Chelsea hian manager lailawk Guus Hiddink enkawlna hnuaiah match 11 chhung hneh loh an tawng tawh lo a, mahse zanin an khingpui tur PSG hian tun season league match 26-ah hneh loh an la tawn miah loh avangin Blues tan fiahna hautak a ni dawn.

A vawi thum nan

Chelsea leh PSG te hi tun hnai Champions League knockout round-ah a zawna an vawi thum inhmachhawnna tur a ni a, 2014-15 season khan last 16-ah an lo inhmachhawn tawh a, 3-3 niin away goal rule hmangin PSG an tlang.

Kum 2013-14 season pawh khan quarterfinal-ah lo inhmachhawn tawhin goal thum ve ve bawk an khung a, hemi ṭum hian away goal rule hmangin Blues an chak thung.

Terry a chiang lo?

Chelsea hian hliam vangin Kurt Zouma chu an chhawr thei dawn lo chiang a, captain John Terry dinhmun a chiang lo bawk. Malpui na vangin Terry hi a inkhel thei lo a nih chuan Gary Cahill leh Branislav Ivanovic te tlarhnungah an inkawpin a rinawm.

Chelsea inngahna tur chu Diego Costa a ni dawn a, Hiddink enkawlna hnuaiah Spain International hian match sawm a khelh aṭangin goal riat a khung tawh a ni.

Chak tluang PSG

Laurent Blanc-a naute hian tun season-ah Champions League group stage-a Real Madrid an hneh loh bak kha chu inelna hrang hrangah an la tlawm miah lo. French Ligue 1-ah pawh point 24 ngawtin hma an hruai fal tawh a ni.

Captain Thiago Silva leh Zlatan Ibrahimo-vic te chu an match hnuhnung bera Lille an khelh ṭumin chawlh tir niin zanin hian team khaidingtu tur an ni ang.

Zanin dar 1:15 vek hian Portuguese club Benfica chuan Russian club Zenit Saint Petersburg an lo mikhual bawk ang.

UCL Last 16 - 1st Fixtures

Zanin Inkhel Tur

Benfica 1:15 AM Zenit

PSG 1:15 AM Chelsea

February 17, Nilaini Zan

Gent 1:15 AM Wolfsburg

Roma 1:15 AM Real Madrid

February 23, Thawhlehni Zan

Arsenal 1:15 AM Barcelona

Juventus 1:15 AM Bayern Munich

February 24, Nilaini Zan

PSV 1:15 AM Atlético Madrid

Dynamo Kyiv 1:15 AM Manchester City