Villa Park-ah Liverpool an huangtau

Liverpool striker Daniel Sturridge-a'n a dam tawh tih khelmual chhungah a lantir a, October thla hnua starting eleven a chan hmasak berna inkhelah goal a khung nghal.

Pathianni zan khan Liverpool chuan khual-mualah Aston Villa an lenchilh a, Premier League table mawngphah team lakah hian 6-0 in hnehna an chang.

Liverpool tan Sturridge bakah James Milner, Emre Can, Divock Origi, Nathaniel Clyne leh Kolo Toure-te'n goal khat ṭheuh an khung a, October 1983 hnua Villa-in league match-a goal ruk an chhuah lehna hmasa ber a ni.

Sturridge a dam

Kar hmasa Inrinni khan England manager Roy Hodgson-a'n Euro 2016 atan striker duhthlan tur a ngah thu a sawi a, Jamie Vardy, Harry Kane leh Wayne Rooney-te hming a lam.

Hming lamrik zinga tel lo Sturridge-a'n ngaih-thah chi a ni lohzia khelmual chhungah a lantir a, goal a khung bakah hian a goal shot chu Villa keeper Mark Bunn-a'n ṭha takin a dan sak bawk.

Hliam vanga tun season-a match riat chiah la khel Sturridge hian goal nga a khung leh der tawh a, goal khung thei mamawh Reds tan English striker lo kir hi a lawmawm khawp ang.

Kum 26-a upa striker chuan, "Khelmual chhunga ka lo kir leh ta hi ka lawm a, a pawimawh ber erawh goal tam tak khung chunga kan chak hi a ni," a ti.

Sturridge hi Premier League bikah Liverpool tan minute 118 dan zela goal khung ang a ni a, Reds player zinga record ṭha ber a ni.

Liverpool lawmna

Reds-in Sturridge dam bakah lawmna tur dang an neih chu Philippe Coutinho dam leh ta hi a ni. Hliam vanga a chawlh reng hnuin Brazilian playmaker hian West Ham lakah goal a khung tawh a, Villa an hnehna inkhelah assist vawi hnih a nei bawk.

Liverpool tlarhmaa Sturridge, Coutinho leh Roberto Firmino-te inkawp an hmuhnawm a, midfield-a inkawp Jordan Henderson, Can leh Milner-te'n an khel
ṭha hle bawk.

Reds manager Jurgen Klopp chuan, "Philippe Coutinho leh Daniel Stu-rridge-te khelmual chhunga an awm hi chuan result a danglam ṭhin," tiin a player ṭha pahnih a nei let leh ta chu a lawm hle.

Liverpool hian Feb-ruary 19-ah Europa Lea-gue Round of 32 khel turin Augsburg chu khual-mualah an lenchilh leh dawn a ni.